Home Gobierno Aruba tin un Gobierno nobo cu ta consisti di 8 minister y...

Aruba tin un Gobierno nobo cu ta consisti di 8 minister y 1 minister Plenipotenciario

611
0
SHARE
- Advertisement -

ORANJESTAD(AAN): Diahuebs atardi durante un conferencia di prensa yama pa Formador Mr. Evelyn Wever Croes, a wordo anuncia cu Aruba tin un Gobierno nobo porfin.

Durante e conferencia di prensa, e lider di MEP a indica cu e negociacionnan no tabata facil.

“Nos a cuminza como 3 partido cu a bay eleccion cu posicionnan propio, cu algun posicion contradictorio na otro, hopi posicion igual cu otro y pueblo a papia”.

“Nos no a pidi pa un coalicion, pero pueblo a duna nos un coalicion y nos a tuma e responsabilidad di bay forma un coalicion”.

Esaki segun Mr. Wever Croes, kende a anuncia oficialmente kendenan ta bay ta e ministernan di Gabinete Evelyn Wever Croes I.

  • mr. Evelyn Wever-Croesmes ta bira Prome Minister, esta Minister di Asuntonan General, Integridad, Energia y Inovacion.
  • mr. Xiomara Ruiz-Madurota bira Minister di Finanzas, Asuntonan Economico y Cultura.
  • Glenbert Croesta bira Minister di Asuntonan Social y Labor.
  • Dangui Oduberta bira Minister di Turismo, Salubridad Publico y Deporte.

Akinan lider di MEP a anuncia cu Oduber lo haya un asistencia special di Dr. Arturo Vallejo, debi na e cantidad di trabao cu e ministerionan aki ta exigi y debi na e experiencia cu Dr. Vallejo obviamente tin riba tereno di salubridad.

  • Chris Romerota bira Minister di Transporte y Comunicacion y Sector Primario.
  • Otmar Oduberta Vice-Prome Minister di Aruba y ta bira Minister di Infrastructura y Medio Ambiente.
  • Andin Bikkerta bira Minister di Husticia y Inmigracion.
  • Dr. Armando ‘Rudy’ Lampeta bira Minister di Enseñanza, Ciencia y Desaroyo Sostenible.
  • Guilfred Besarilta bay bira Minister Plenipotenciario di Aruba na Hulanda.

Durante e conferencia di prensa e lider di MEP a bisa tambe cu Rocco Tjon ta bay ta lider di Fraccion di MEP den parlamento, mientras cu Adi Thijsen ta bay ta presidente di Parlamento.

E proximo Prome Minister di Aruba a sigui bisa cu e procedura a tuma su tempo, pero esaki tabata necesario.

“Nos a enfoca riba e puntonan cu nos tin en comun, esta integridad y bon gobernacion”.

“Ora cu bo pone bon gobernacion y integridad como nr. 1, den bo proceso di formacion tambe bo tin cu tene cuenta cu e puntonan aki”.

Esaki segun Wever Croes, kende a sigui bisa cu e otro punto sumamente importante ta e situacion financiero di pais Aruba y e gastonan cu mester haya atencion y mester wordo baha, pa por sanea e situacion financiero.

E di tres punto importante di enfoke di Gabinete Evelyn Wever Croes I ta pa pone e ser humano como central, esta e seguridad, trankilidad, cuido medico, cuido social, vivienda social y enseñanza pa e ciudadano di Aruba.

 

 

- Advertisement -

DUNA COMENTARIO

Please enter your comment!
Please enter your name here