Home Social Awe ta dia di “Thanksgiving” of dia di Accion di Gracia y...

Awe ta dia di “Thanksgiving” of dia di Accion di Gracia y e ta wordo celebra aki na Aruba tambe

70
0
SHARE
- Advertisement -

Thanksgiving of Dia di Accion di Gracia ta un celebracion cu ta wordo celebra na Merca como recuerdo di e prome comemento pa gradicimento na 1621 di un grupo di peregrinonan cu nativonan, den cual nan a duna danki na Dios pa e abundancia den cosecha den e mundo nobo. Y si aki na Aruba ta adapta na tur e otro celebracionnan di mundo, pakico no adapta na e celebracion bunita aki tambe pa asina tuma un dia pa gradici pa tur loke nos tin.

Na Merca mayoria di negoshi y oficinanan ta cera e dia aki. Aunque e origen di e celebracion ta religioso, e ta wordo considera como un fiesta tradicional. No tin nada mihor pa expresa gratitud pa tur loque tin y reuni cu bo sernan queri.

Mayoria di personanan na Merca ta celebra e dia aki cu fiestanan familiar na cas, caminda nan ta prepara un tremendo comemento. E pato horna ta e plato principal di e comemento. E pato ta wordo acompaña cu un reyeno traha di pan di maishi etc. Como dessert ta tipico e bolo di appel cu un gran bola di ijscream di vanilia, tur cos anima cu musica di Pasco. Den hopi cas ta comun realiza un oracion di danki. E ta consisti di e fiesta familiar caminda ningun hende por falta y marcando asina e comienzo di e fiestanan di Pasco.

Y mañan ta e tradicional apertura di e temporada di compranan di Pasco. Lugarnan y tiendanan ta ofrece prijsnan di baratiyo caminda hopi hende for di oranan tempran di mainta ta para den rijnan largo den centronan comercial pa nan haya e mihor articulonan. E dia aki ta mundialmente conoci como “Black Friday”. E dia aki si ya caba hopi comerciante a adapte na Aruba caminda mañan lo tin hopi caminda e asina yama Black Friday caminda por probecha di e prijsnan special.

 

Lo ta magnifica tambe cu aki na Aruba pone e fecha aki pa duna danki na Dios pa su bondad y reflecciona riba e innumerable fabornan cu e ta concede nos. Ta asina tanto cu Dios a duna na humanidad. Pa cuminza, el a entrega nos e don di bida y un mundo di maraviya na unda nos tin experiencianan bunita. El a regala nos e amor di nos famia y amigonan y tur e dichanan cu nos ta experimenta.

Aki ta sigui un oracion:

Oh Dios, misericordioso, nos ta duna Bo danki pa Bo generosidad desbordante pa cu nos. Danki pa e bendicion di e cumindanan cu nos ta come y especialmente pa e dia aki. Danki pa nos cas, nos famia, y amigonan, especialmente pa esnan cu awe ta reuni cu nos. Danki pa nos salud y nos trabao. Por fabor, manda un yudanza pa esnan cu tin hamber, cu ta nan so, esnan cu ta malo y sufriendo di e guera y violencia. Nos ta pidi Bo bendicion pa Cristo bo yiu. Amen.

 

E poder di bisa Danki

Frecuentemente nos ta descubri cu cumprando of ricibiendo cosnan por brinda nos satisfaccion of poco di alegria, pero e alegria aki ta solamente pasahero. E accion di expresa Danki ta loque berdaderamente ta aporta satisfaccion y alegria duradero den bo bida.

Expresa gratitud frecuentemente por carga nos di un forza poderoso. Ta tipico pa solamente duna danki ora algo ta bay bon den nos bida. Manera ora nos ta ricibi un aumento di salario of ora nos completa exitosamente un proyecto.

Sinembargo, por ta nos no ta expresa gratitud y aprecio cu regularidad den otro ocasionnan, manera nos ta kere cu nos oracionnan no a wordo contesta of simplemente pa e bendicionnan di tur dia.

Gratitud mas cu un gesto di amabilidad ta un practica cu ta fortalece nos crecimento spiritual. Ta un manera alegre di biba y expresa nos fe.

Duna Danki ta demostra e comprension cu Dios ta stima nos y cu tur e sucesonan den bo bida tin e intencion di bendiciona bo y di desaroya pa bo mes un bon, pa bo crecimiento.

Ta importante pa recorda cu e gratitud ta un di e yabinan spiritual supremo cu ta habri porta pa gozo y pa e satisfaccion duradero. E mihor di e gratitud ta cu e ta brinda nos mas un y mihor cosnan pa cual nos ta agradece. Nunca cansa di duna danki.

Duna danki na Dios tur dia pa loque nos tin ta un excelente manera di uza e gratitud. Tin ocasionnan den cual nos ta considera cu nos bendicionnan ya ricibi como algo comun y nos no ta disfruta di loque ya nos tin. En cambio nos ta biba preocupa pa loque ta parce cu nos falta y esaki ta causa nos descontento y frustracion.

Quizas bo ta haya dificil pa expresa gratitud den cierto ocasionnan, manera ora algo bay malo of ora bo oracion ta parce cu no a wordo contesta. Pero animo, tuma tempo pa reza y haciendo esaki expresa gratitud anticipa y spera cu pasenshi y confia cu e contesta ta yega. Manteniendo y expresando un actitud di gratitud bo ta stimula e glandulanan positivo di bo mente y bo ta haci cu e glandula negativo ta bay reduciendo. Ademas bo ta cultiva e conciencia di Dios como presencia activo y amoroso den bo bida y e bon lo ta resultadonan infalible den bo oracionnan.

Corda: Duna danki awor pa loque bo tin y spera e bendicionnan nobo di Dios.

 

 

- Advertisement -

DUNA COMENTARIO

Please enter your comment!
Please enter your name here