Home Economia Camara di Comercio a y ta keda hopi activo tambe den di...

Camara di Comercio a y ta keda hopi activo tambe den di dos mitar di 2017

14
0
SHARE
- Advertisement -

ORANJESTAD(AAN): Diabierna presidente di Camara di Comercio (KvK) Ernst Mohamed a recapitula riba e actividadnan di KvK durante di dos parti di 2017.

“Camara di Comercio y Industria ta keda activo y tin su actividadnan cu ta bolbe tur aña cu semper bay ta keda bon bishita”.

“ Asina nos por menciona e evento Business Plaza – Get Started! cu a tuma luga 1 di Juli 2017, caminda tur e bishitantenan por a ricibi diferente informacion al caso encuanto con pa cuminza un negoshi”.

“E di dos tanda di e debate politico di KvK a tuma luga y a haya diferente comentario den pueblo y riba medionan social”.

Mohamed durante e conferencia di prensa a sigui bisa: “Directiva di KvK tambe a reuni cu diferente di e partidonan politico pa intercambia idea y asina duna atencion na e puntonan cu tur partidonan a campaña cune. E reunionnan aki a contribui na e documento di KvK cu ta trece dilanti e puntonan di atencion primordial den perspectiva di KvK pa e siguiente gobernacion”.

KvK a tene reunion tambe cu Gobernador, Departamento di Enseñanza, Departamento di Impuesto, Departamento di Asunto Economico y Departamento di Labor. Tur e reunionnan aki a bay den bon forma y asina crea enlace-nan pa brinda mas posibilidadnan comercial pa e empresario, segun e presidente di KvK, kende a sigui bisa cu Camara di Comercio a reuni tambe cu CBA y banconan local riba e tereno di e-commerce y pa formaliza un sistema di pago online.

Pa fomenta mas negoshi y yuda empresarionan nobo, KvK ta creando un asina yama incubador, caminda lo bay brinda espacio dedica na educa y stimula negoshinan inovativo. Pa cu esaki KvK a organiza den colaboracion cu COSME sesion cu diferente stakeholders pa yega na formaliza incubators pa empresario, haya fondo y organisa workshops.

KvK ta tumando parti tambe na e desaroyo di e Burgerlijk Wetboek 2 den e rol como representante di e sector empresarial. Ademas, KvK ta trahando duro pa logra introduci entrepreneurship como un vak na schoolnan pa asina prepara nos hobennan cu kier lanta nan propio negoshi.

Otro actividad cu sigur semper ta bon bishita ta e FAB 3 y FAB 4. Esakinan ta cursonan cu KvK ta brinda pa e comerciante chikito cu kier expande su conocemento di administracion financiero. FAB ta abreviacion pa “Financiële Administratie voor Beginners” y ta consisti di 4 parti. FAB 1 y FAB 2 a tuma luga na comienzo di aña. FAB 3 a cuminsa dia 29 di Augustus y FAB 4 dia 8 di November.

KvK kier recorda cu pa e cursonan aki mester registra na tempo mirando cu cupo ta limita. Otro curso exitoso cu tur aña ta hopi popular ta e curso “Empresario Independiente chikito y mediano”. Esaki ta un curso intensivo cu ta diseña pa eleva conocemento di e empresario.

Fuera di cursonan KvK a organiza varios lectura y workshop den su auditorio. Asina por menciona e charla encuanto Big Data na September, e Decision Making workshop na october y tambe e sesion cu Directiva di KvK a tene cu e sector di construccion na November 2017. E sesion cu e sector ta algo cu KvK ta sigui haci pa duna atencion na tur e sectornan comercial y asina brinda oportunidad di scucha nan preocupacion y idea pa despues comunica esaki cu e ministerionan concerni.

Dia 3 di November a tene e apertura di e exposicion di e artistanan local di Stichting Mira. E exposicion aki ta decora e murayanan di KvK pa un aña largo pa asina tur bishitante di KvK por aprecia e arte di e artistanan studiante di Stichting Mira. E ultimo evento grandi pa publico e aña aki tabata e Women In Business Event cu a tuma luga dia 15 di November ultimo na Tierra del Sol. E evento aki a inspira hopi damas y a wordo bon comenta. Pa 2018 e evento aki sigur lo bay ta ainda mas grandi y exitoso.

KvK mes no ta para keto tampoco y tambe ta cambiando pa un sistema mas moderno pa por brinda ainda miho servicio. KvK lo implementa un sistema di registro nobo pa asina por duna servicio 24/7 via su portal. Recientemente tambe KvK a colabora pa saca e segundo edicion di e revista Entrepreneur Aruba y pronto lo saca e edicion pa Q4 di 2017.

KvK ya caba tin su actividadnan planea pa 2018 y ta sigur cu esaki lo bira uno yen di inovacion y exito comercial di nos empresarionan local.

 

- Advertisement -

DUNA COMENTARIO

Please enter your comment!
Please enter your name here