Home Economia Cantidad di placa den circulacion a aumenta

Cantidad di placa den circulacion a aumenta

81
0
SHARE
- Advertisement -

ORANJESTAD (AAN): E resumen di e Relato Mensual di Juli 2017 ta mustra cu den e luna di Juli 2017, e cantidad di placa den circulacion a aumenta cu Afl. 60,3 miyon te na Afl. 4.194,5 miyon, compara cu Juni 2017. Esaki a resulta door di un expansion den e activo domestico netto (+Afl. 81,5 miyon) y un bahada den e reserve di divisa netto (-Afl. 21,1 miyon).

E aumento den e activo domestico netto a surgi for di subida den credito domestico (+Afl. 85,3 miyon), mientras cu transaccionnan no relata na credito a registra un bahada (-Afl. 3,8 miyon). Credito domestico a expande door di mas credito bancario netto na e sector publico (+Afl. 83,2 miyon) y mas credito bancario na e sector priva (+Afl. 2,0 miyon).

E expansion den credito bancario netto na e sector publico a surgi primordialmente door di un bahada den e depositonan di gobierno (-Afl. 81,2 miyon). Credito bancario na e sector priva a subi principalmenta door di mas hipoteca pa vivienda (+Afl. 6,2 miyon), cual a worde mitiga pa un gran parti pa menos credito na empresa (-Afl. 3,1 miyon) y credito na consumidor (-Afl. 1,1 miyon).

E bahada den transaccionnan no relata na credito a worde causa principalmente door di subida den e asina yama “shareholders’ equity” y bahadanan den debenan y e asina yama “accounts receivable and prepayments” y transaccionnan di clearing.

E bahada den e reserva di divisa netto di e sector bancario ta debi na benta netto di divisa na publico (-Afl. 180,8 miyon), principalmente relaciona cu importacion di mercancia, transferencia netto pa cuentanan den exterior di companianan local, otro servicionan, otro inversionnan, transferencia coriente y e asina yama “financial derivatives”. Esaki a worde mitiga pa un gran parti pa compra netto di divisa for di publico (+Afl. 159,6 miyon), primordialmente relaciona cu entrada for di turismo, servicio di transportacion, y inversion directo.

Inflacion:

E nivel general di prijs, cu ta worde midi door di e indice di prijs di consumo, a registra un bahada di 1,1 porciento den e luna di Juli 2017, compara cu Juli 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Otro componentenan cu tambe a registra bahada ta e componentenan “Transporte”, “Recreaccion y Cultura”, “Mobilario” y “Comunicacion”.

Di otro banda, e componentenan “Cuminda y Bebida No-Alcoholico”, “Educacion”  y “Restaurant y Hotel” a registra un subida. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,1 porciento compara cu Juli 2016. Pa loke ta trata e promedio anual di e tasa di inflacion, esaki a keda mescos, esta un bahada di 0,4 porciento na Juli 2017, compara cu Juni 2017.

Na Juli 2017, e cantidad di turista a registra 102.272 bishitante, cual ta 2.854 bishitante (+2,9 porciento)  mas cu na Juli 2016. Esaki a resulta principalmente door di un subida di 5.874 bishitante (+9,2 porciento)) den turista for di e e mercado Norte Americano. Di otro banda, e mercado Latino Americano a registra un bahada di 8,0 porciento (-1.826 bishitante).

E crecemento den e mercado Norte Americano a worde causa primordialmente pa mas bishitante for di Merca (+5.462 bishitante of +8,9 porceinto). E caida den e mercado Latino America a resulta principalmente pa menos bishitante for di Venezuela (-4.059 bishitante of -29.1 porciento).

E cantidad di turista crucero a registra un subida di 12.967 of 68,5 porciento te na 31.888 bishitante na Juli 2017, compara cu Juli 2016. E cantidad di barconan a expande for di 8 na Juli 2016 pa 14 na Juli 2017.

Entrada di Gobierno:

Na Juli 2017, entrada di gobierno a suma Afl. 77,9 miyon, cual ta Afl. 27,7 miyon menos compara cu e mesun luna di e aña anterior. E caida aki a resulta for di bahada den tanto entrada di impuesto (-Afl. 20,6 moyon) como entrada no relata na impuesto (-Afl. 7,3 miyon).

E bahada den entrada di impuesto ta relata principalmente na menos entrada di impuesto riba ganashi (-Afl. 23,5 miyon) y impuesto riba propiedad (-Afl. 4,9 miyon). Di otro banda, impuesto riba entrada (+Afl. 3,3 miyon), impuesto riba divisa (Afl. 2,4 miyon) y impuesto riba salario (+Afl, 1,1 miyon) a registra aumento.

- Advertisement -

DUNA COMENTARIO

Please enter your comment!
Please enter your name here