Home Comentario Completamente di acuerdo si e Plataforma FDEC por bin bek

Completamente di acuerdo si e Plataforma FDEC por bin bek

15
0
SHARE
- Advertisement -

Comentario:

Pa Mercedes Monge

Agregando na locual e Parlamentario di fraccion di MEP, sra. Shailiny Tromp-Lee a declara den conferencia di prensa ayera, mi ta bon pa rememora un rato, kico Fundacion Desaroyo Educativo Comunitario a nifica pa nos cultura, pa nos comunidad Arubano, pa mucha, hoben y adulto durante binti aña largo, te cu nan a para su existencia.

Mi ta corda cu FDEC a surgi como un iniciativa di sra. Lili Beke-Martinez, durante e temporada cu e tabata minister, entre otro di cultura. Esaki tabata na 1997, kiermen binti aña pasa. Por corda cu tur aña, na final di e aña escolar FDEC tabata tin exposicion di arte y presentacion di su sinfonica, y e alumnonan mes tabata diseña e carchinan di invitacion, cu cuadranan pinta pa nan mes.

Ademas di e disciplina musical, masha bunita obra di man nan tabata traha, ademas di pintura y airbrush cu ta otro arte riba su mes y hopi interesante.

Den e parti di musica, sin duda algo inolvidable cu mi a yega di mira (durante un entrevista) ta cu un di e pilarnan di cah’i orgel tabata duna les for di e historia mes di con a surgi esaki na Aruba, algo unico sigur, te e manera con e ta wordo toca, con e notanan ta wordo hinca den otro.

Guitara, cuarta, piano, vocalizacion, na un nivel hopi halto tabata parti di e lesnan aki, pa cual nan tabata entrega certificado, y berdaderamente ta di lamenta cu un desaroyo asina bunita y importante a wordo para. A mi mes a yega di critica e decision aki den nos corant.

Y bunita ta cu e publico no mester a paga pa presencia e conciertonan. Cas di Cultura, unda generalmente e tabata wordo presenta, kizas no tabata yena por completo pero si tabata tin un bon publico presente. Si mi ta hera hasta un lista di spera a keda atras pasobra e interes y demanda tabata sumamente grandi.

Un caracteristica importante tambe tabata cu hasta personanan di mas di 80 aña tabata participa como alumno, pasobra e plataforma aki a encera e aspecto di bin hunto como famia. Kiermen, for di e nieto te cu e wela of welo tabata parti di e bunita proyecto aki.

Como ciudadano y como reportero mi ta apoya cien porciento si un proyecto asina aki por bolbe wordo reactiva den nos comunidad.

- Advertisement -

DUNA COMENTARIO

Please enter your comment!
Please enter your name here