Home Actividad Especial Conferencia Medico “DAS Clinic Caribbean” ta tuma lugar na Aruba awe y...

Conferencia Medico “DAS Clinic Caribbean” ta tuma lugar na Aruba awe y mañan

31
0
SHARE
- Advertisement -

Dirigi door di Specialistanan pa nos profesionalnan den Salud:

ORANJESTAD (AAN) – Awe, Diabierna 17 y mañan Diasabra 18 di November 2017, lo tuma lugar na e Sala di Conferencia di Alhambra, Divi Village, Aruba, e Conferencia Medico “Das Clinic Caribbean”, cu participacion di docternan Specialista di Aruba, Curacao, Bonaire, Suriname y Hulanda.

E organizadornan di e conferencia aki ta dr. Maarten Visschers, Internista Infecciologo, dr. Richard van Vugt, Reumatologo y dr. Sandro Waterloo, Internista Geriatrico.

Matutino DIARIO a entrevista dr. Sandro Waterloo di ken nos a haya informacion relaciona cu e Conferencia Medico Regional aki.

Dr. Waterloo a duna di conoce cu e conferencia aki ta dirigi na tur docter local, pero tambe di Curacao, Bonaire, Hulanda y Suriname.

“E ta un conferencia medico pero tambe nos ta haya enfermeronan, hendenan cu ta traha cerca di docter di cas y paramedico cu tambe lo ta presente.

E ta un conferencia tocante rheumatology, infecciologia, geriatria y endocrinologia. Nos lo bay tin 18 charla cu ta bay cubri dos dia, awe 17 y mañan 18 di November, den Alhambra Divi Conference Room”.

DIARIO a puntra dr. Waterloo cual ta e meta di e conferencia medico aki. El a menciona dos meta.

“E prome meta ta pa transmiti mas conocemento pa e docternan di cas y e otro docternan y e di dos meta ta pa specialista y docternan di cas topa otro. Pasobra den nos trabao nos no ta wak otro, nos ta conoce via nomber pero nos no ta mira otronan den caya; pues ta bon pa trece e docternan hunto”, dr. Waterloo a expresa.

E charlanan lo wordo duna pa specialistanan riba e temanan cu lo wordo trata. E temanan aki ta di medicina interno y rheumatology.

“Un docter semper tin cu keda siña y esaki ta un di maneranan pa haci esey. Esey ta loke nos ta ofrece”, dr. Waterloo a indica.

“Semper ta bon pa no solamente docternan di cas pero otro specialistanan tambe bin, por ehemplo docter di mucha, ciruhano, etc., pa scucha kico ta pasando riba e tereno aki di medicina interno. Asina nan por identifica mihor cierto sintomanan cu un pacient por presenta.

DIARIO a pidi dr. Waterloo pa amplia un tiki mas riba e tema di Arthritis Rheumatoid, pasobra tin hende na Aruba cu ta bao impresion Arthritis ta abarca tur tipo di Reuma.

“Reuma ta encera 200 diferente tipo di malesa cu hunto nos ta yame Reuma. E malesa ora ta bira arthritis rheumatoid ta solamente un di e 200, pero e ta hopi conoci y frecuente. Tin por ehemplo Arthritis Psoriatico, Arthritis Urico, entre otro” dr. Waterloo a subraya.

DIARIO a puntra dr. Waterloo si na Aruba nos poblacion ta conta cu tur e asistencia medico y remedi pa trata e problemanan di salud menciona y cu lo wordo trata durante e Conferencia.

Tambe nos a puntre si Aruba tin specialistanan den e diferente rama cu el a menciona.

“Aki na Aruba nos tin un grupo di internista, di cual ami mes ta specialista pa hende grandi (Geriatria) y nos tin tres Infecciologo, pero nos ta falta Rheumatologo y Endocrinologo. Pues, e trabaonan aki ta wordo haci door di otro internistanan”, dr. Waterloo a splica.

“Aki na Aruba nos ta bendiciona si nos ta pensa riba Venezuela por ehemplo. Nos ta bendiciona cu nos tin docternan cu por wak nos pacientnan; nos ta bendiciona cu nos tin hopi remedi, hasta remedi caro y si tin indicacion tur pacient por haya esey”.

Dr. Waterloo a menciona tambe cu e Conferencia aki ta wordo patrocina door di algun industria medico, entre nan Janssen. E

“Aki na Aruba no tin un instancia cu ta paga pa conferencianan medico tuma lugar. Pesey nos ta hopi gradici cu nos sponsornan cu ta haci posible e conferencia aki, cu nos ta spera cu e lo ta un exito”, dr. Waterloo a conclui.

 

 

- Advertisement -

DUNA COMENTARIO

Please enter your comment!
Please enter your name here