Conocido Wouter Louis-Rufino de Ruiter a fayece

    976
    0
    SHARE
    - Advertisement -

    ORANJESTAD (AAN): Den fin di siman, a cuminza circula e informacion cu e empresario hoben Wouter Louis-Rufino de Ruiter a bira malo, y a acudi numeroso biaha na Servicio di Emergencia na Hospital.

    El a acudi na Hospital cu dolornan agudo den su cabez.  Famianan a laga sa cu cada biaha, e hoben ta wordo revisa door di Docter, y nan ta djis mande cas bek cu recept pa pasa busca Paracetamol pa alivia e dolor.

    Pero e dolornan tabata sigui intensifica, y cada biaha ta regresa pa busca yudanza.

    Sinembargo e tabata haya mesun contesta.  E dolornan no tabata ni bira menos cu Paracetamol.

    Increible pa mira con un hoben asina dinamico, casi no tabata haci nada mas debi na e dolornan inmenso.  Despues sinembargo e situacion a empeora y el a bira mas malo, y na Hospital a hasta bay for di tino.  Tin indicacion cu e lo a bay den coma.

    Dialuna anochi el a bin ta fayece, lagando su famia y amigonan rond Aruba den shock.

    Wouter Louis-Rufino de Ruiter a nace na ‘s-Gravenhage na Hulanda dia 3 di Januari 1990, pues tin 27 aña di edad.  E ta un persona cu tabata studia un tempo pa Abogado, y tabata hopi interesa den politica.  E tabata gusta yuda tur organizacion den asuntonan di logistica y idea.  Ultimo e tabata propietario di un compania di Real Estate.

    Famianan a bin haya sa, cu ta un tumor tabatin den su cabez, y esey lo a causa su morto repentino.  No ta conoci si acaso den pasado ya caba e tabata sinti sintoma di esaki of no.

    Wouter Louis-Rufino de Ruiter tabata un hoben cu tabata bishita Redaccion di DIARIO regularmente, pa asina papia riba desaroyo en general riba e isla.  Ultimo biaha cu e tabata na DIARIO, net un turista tabata relata na redaccion di un dificultad cu el a pasa aden cu su Car-Rental.

    Inmediatamente Wouter Louis-Rufino de Ruiter a dicidi na duna algun tip na e turista, pa mustre den ki direccion e por cana pa asina haya solucion.  E turista a keda hopi agradecido na dje.

    Na famia di Wouter, DIARIO ta expresa su mas profundo palabranan di condolencia.

     

    - Advertisement -

    DUNA COMENTARIO

    Please enter your comment!
    Please enter your name here