Home Parlamento Corupcion ta tuma lugar atravez di Infrastructura

Corupcion ta tuma lugar atravez di Infrastructura

169
0
SHARE
- Advertisement -

Presidente di “Transparency International” a mustra den Parlatino:

ORANJESTAD (AAN) – Den conferencia di prensa convoca pa e fraccion di Partido Movimiento Electoral di Pueblo, Parlamentario sr. Rocco Tjon a sigui elabora tocante e reunion di Parlatino, cu a tuma lugar na Panama.

Sr. Rocco Tjon a duna di conoce cu tabata tin un foro interregional titula “E transparencia y lucha contra corupcion” cu tambe tabata di suma importancia.

El a menciona cu e presidente di “Transparency International” a duna un discurso unda el a elabora con corupcion awendia ta tuma lugar.

“El a bisa bon cla cu corupcion no ta algo di sector publico so, pero e ta algo unda cu sector priva tambe ta hunta un rol grandi, na unda practicamente e sector publico y sector priva ta yega na otro”, e parlamentario a menciona.

Parlamentario Tjon a indica cu e importancia di esaki ta cu e discurso cu el a hiba no ta solamente a base di teoria pero a base di investigacionnan cu Transparencia Internacional a haci den hopi pais di Latinoamerica.

“E ta bisa cu pa por evita cu corupcion tuma lugar, mester tin e poder pa haci algo y tambe e recursonan pa zorg pa algo wordo haci. Y na final di dia ora bo papia di corupcion bo mester por bisa cu e derechonan fundamental di e ser humano a wordo trapa”, Parlamentario Rocco Tjon a indica.

E parlamentario a agrega cu tambe a sali na cla cu hopi caso di corupcion tin na America Latina, den diferente pais tin masha hopi politico cu a haci nan mes culpable di corupcion.

“Y e ta splica cu e modus operandi awendia ta atravez di infrastructura, tereno y NVnan cu ta wordo lanta practicamente pa loco. E tipo di actonan aki ta tuma lugar, y ta hopi importante mirando tambe si nos traduci esaki na Aruba, tur e conmocion cu tabata tin algun tempo pasa, muy en particular pa terenonan cu a wordo duna na cierto hendenan, y si nos wak e relato cu Minister actual sr. Otmar Oduber a duna, unda el a splica kico el a hereda tambe aworaki na diferente departamento, mi ta kere cu e ta alarmante. Y pesey tambe nos a palabra cu Fraccion di POR y Fraccion di RED y nos ta bay haci e invitacion aki tambe na Fraccion di AVP pa hunto, nos como Parlamento den su totalidad, manda yama puntra Minister Otmar Oduber pa e bin duna un splicacion tocante kico précis el a hereda, pa asina por tin transparencia”, Parlamentario Rocco Tjon a señala.

Na otro banda, loke e Presidente di Transparencia Internacional a trece dilanti, pa por combati corupcion y preveni esaki tambe lo mester tin procesonan transparente y muy en particular, pa loke ta trata informacion, infrastructura, proyectonan, etc., esakinan mester ta publica tambe pa asina bo por evita cu hendenan kizas ta wordo tilda di corupcion inhustamente.

“Mi ta kere como parlamentario cu ta importante pa pueblo ta informa, pa tin transparencia riba esaki, pasobra na final di dia y mirando e situacion cu e topico aki a ocasiona algun tempo pasa. E punto di mas importante cu mester tin pa por preveni esaki ta e liderazgo y e maneho politico”, e parlamentario a agrega.

El a subraya cu e orado a trece bon cla cu no ta e cadena hudicial pasobra no ta un asunto di husticia combati y preveni corupcion. E ta un asunto politico.

“Pues ta hopi importante pa nos tin politiconan cu kier tin transparencia, pa asina preveni. Y mi ta kere cu si nos mira e programa di gobernacion, pa e simple hecho cu ta bin cu un Ministerio di Integridad y un Integriteit Kamer cu ta bay percura pa integridad wordo fomenta den henter e aparato gubernamental, mi ta kere cu ta prueba cu e boluntad politico tey, pero e mester tey no solamente den gobierno y e parti ehecutivo, pero sigur for di den Parlamento nos mester duna esaki su atencion, y nos lo hacie tambe atravez di, entre otro, e comisionnan fiho” el a subraya.

- Advertisement -

DUNA COMENTARIO

Please enter your comment!
Please enter your name here