Home General Crijojo Trappers a haya donacion di Romar Trading y Dolce & Gabbana,...

Crijojo Trappers a haya donacion di Romar Trading y Dolce & Gabbana, pa sigui cu nan excelente trabao di yuda bestia

13
0
SHARE
- Advertisement -

ORANJESTAD(AAN): Diamars mainta durante un desayuno na Ten 11 Coffee Lounge, a tuma lugar entrega di dos cheque na Crijojo Trappers Aruba.

E proyecto di Crijojo Trappers  pa yuda cachonan na Aruba, ta cay bao di Nisi Canis Heart of Gold Foundation y ta wordo coordina pa señora Merviné Kock.

Durante un entrevista cu DIARIO, señora Kock a splica cu e dos donacionnan cu el a haya Diamars ta di Dolce & Gabana y di Romar Trading.

E donacion di Romar Trading a bin despues di un anochi di cocktail organiza pa Miss Universe Aruba 2017 Alina Mansur, special di recauda fondo.

Esun di Dolce & Gabbana a bay atravez di Shohaira Da Silva, unda cu cierto porcentahe di venta a wordo destina pa  Crijojo Trappers.

Tanto Romar Trading como tambe Dolce & Gabbana a entrega un cheque di 2.500 florin pa e bon causa.

Segun señora Kock, e placa ta bay wordo uza pa paga gastonan di veterinario.

“Nos trabao ta pa captura cacho y pushinan di caya y hiba nan veterinario, unda cu nan ta wordo steriliza y ta saca e bishinan for di nan curpa”.

“Banda di esaki nan ta haya un microchip den nan curpa y nan ta wordo vacuna”, segun e coordinador di e proyecto, kende a sigui bisa cu te aworaki e programa ‘Sterilizami’ ta paga pa e sterilizacionnan, pero e resto Crijojo Trappers mes mester paga, mescos cu ta conta pa e articulonan di trabao cu e boluntarionan tin mester di dje, manera entre otro handschoen.

E placa recauda ta yuda tambe den caso cu un boluntario wordo mordi por ehempel, unda cu e tin cu haya un asina yama ‘tetanus prik’.

“Nos tin 9 boluntario y nos trabao ta casi 24/7, pasobra nos ta wordo yama na varios occasion pa casonan di maltrato di cacho of pushi por ehempel”.

Esaki segun señora Kock, kende a indica cu el a puntra Serlimar cuanto cacho y pushi nan ta piki pa dia banda di caminda cu auto a dal mata y nan a indica cu pa dia esaki ta un average di 30 cacho cu pushi.

Banda di esaki segun señora Kock, entre 6000 y 8000 bestia ta wordo mata tur aña, den e asina yama ‘Kill Cage’ cu tin na Wayaca, cu ta un lugar unda cu hendenan cu no kier nan bestia mas por trece esaki pa wordo mata.

Segun e coordinadora di Crijojo Trappers, ta di lamenta tambe e manera con e bestianan aki ta wordo mata, cu no ta uno cu ta manera ora bo bestia ta malo y nan ta pone drumi.

“Den e Kill Cage nan ta djis duna e bestia un hangua unda cu ta y e ta keda bati pa 15 minuut largo y ta sufri prome cu e muri”.

“Tur e cosnan ey a pone cu nos a dicidi di duna e bestianan na Aruba un mihor bida”.

Esaki segun señora Kock, kende a indica cu e ta haya cu Aruba ta percura pa su bienestar Economico, pero no pa bienestar humano di e animalnan riba nos isla.

Pesey señora Kock a bisa cu e ta bay bati riba porta di Gobierno nobo te ora cu nan scucha.

Un di e metanan ta pa e Kill Cage wordo uza hopi menos of  caba mes, mientras cu un otro meta ta pa e ley di cacho cu a bin cune, mester wordo ehecuta.

El a sigui bisa cu e pueblo aki mester wordo concientiza entre otro riba sterilizacion di nan bestia.

Tin hende tin placa pa cumpra cachonan caro di raza, pero nan ta bisa cu nan no tin placa pa steriliza e bestianan ora cu esaki ta necesario.

 

- Advertisement -

DUNA COMENTARIO

Please enter your comment!
Please enter your name here