Home Cultura Crisis y desafionan di Partidonan Politico

Crisis y desafionan di Partidonan Politico

56
0
SHARE
- Advertisement -

Lazo di cooperacion FOTH-DIARIO

Politologo Lic. Guillermo Villalobos Solé

(Prome parti)

Den e prome parti di e columna aki, lo mi referi na e aspectonan mas destaca di e crisis cu e partidonan politico ta atravesa, lagando pa un di dos articulo tur locual ta relativo na e desafionan cu e actornan di nos bida publico ta enfrenta.

E final di e era bipolar, e agotamento di e conflicto Este-Oeste y e fin di e Guera Frio a anuncia un crisis den e schemanan ideologico y politico cu tabata sirbi di punto di referencia pa e accion social y den dje, e accion politico partidario.

Den e sentido aki, e dos ultimo decadanan di siglo pasa y e 17 añanan cu a transcuri di siglo XXI, a impone hechonan nobo cu ta caracteriza e escenario actual dentro di cual e actornan politico y social ta move; mi ta referi na e globalizacion no solamente economico; na e interdependencia entre e nacionnan; e auge di e informacion y comunicacion; e transnacionalizacion di e decisionnan politico; e surgimento di actornan nobo; e consolidacion di un cultura cu ta sublimiza e individuo; e existencia di situacionnan limite manera e crisis medio ambiental y e revolucion tecnologico cu a modifica e relacionnan social y laboral.

Den e entorno aki, e democracia a bin ta habriendo paso di un manera importante pero, paradohicamente den un doble valoracion: Di un banda, ta wordo evidencia un apoyo significativo na e democracia como sistema di gobierno; pero na mesun momento, ta existi un insatisfaccion creciente di e ciudadanonan respecto e funcionamento di e democracia, a partir di un clase politico cu den ehercicio di lo publico, ta parce di a keda pega den e formanan bieu di gobernabilidad.

Por mira esaki, ciertamente agrava, door di e cuestionamento ciudadano na e eficacia di e institucionnan politico, asocia na e crisis di intermediacion social y politico y na e crisis di representatividad deriva di e perdida di credibilidad den e partidonan politico en particular.

E elementonan aki ta hiba nos awe, na confirma cu ta existi un percepcion ciudadano negativo riba e partidonan politico cu ta extende su mes na tur e largo di e planeta, cu su excepcionnan y cu ta duna espacio na e afirmacion cu nos ta bibando un crisis di e partidonan politico.

Lo mi desea di profundiza un poco mas den e punto aki, presentando varios factor cu ta splica e crisis cu ta biba awe den e actornan politico y social, specialmente, esnan di caracteristicanan tradicional.

Na prome lugar, permiti mi referi na tres elemento di contexto cu ta determinante pa compronde e crisis:

  1. Mi ta destaca e aspectonan vincula na e transformacionnan di e escenario internacional, na e economia, e politica y e sociedad mes (globalizacion, desaroyo di conocemento, cambio di paradigma, desaroyo tecnologico y modelo nobo).
  2. E aspectonan cu tin di haber cu e procesonan di reforma economico cu tin impacto directo riba e Estado, entendiendo esaki como cambionan den e representacion politico unda e fenomeno di e tecnocracia ta emerge, substituyendo e partidonan.
  3. E surgimento di otro actornan y/o competidornan, kiermen, e sociedad civil y e medionan di comunicacion, debi den parti na: e perdida di base social di e partidonan; su papel di articulacion y agregacion di interesnan y su funcion di mitiga e conflicto social cu a bira fuertemente debilita; y e accion di e actornan nobo aki, cual ta wordo duna na e margen di e institucionalidad partidario y estatal.

(Referencia: Dr. Ricardo Cordoba; Dr. Edelberto Torres; Dr. Edgar Jimenez na OEA, CEPAL, Internacional Socialista).

Na di dos lugar, permiti mi destaca e aspectonan interno propio di e partidonan politico:

  1. E factornan cu tin di haber cu e funcionnan cu e partidonan ta cumpli den e sistemanan politico. Na e momentonan aki, e mayoria di nan no ta cumpliendo bon cu e funcionnan esencial di socializacion, movilizacion, participacion y legitimacion. Tin evidencianan cla cu nan ta carece di perspectiva; incumplimento di speranza; ineficacia pa resolve problemanan; y falta di alternativanan viable.
  2. Di otro banda, tin e elementonan asocia na desprestigio di e politica como resultado di e corupcion marca door di formanan masha diverso cu ta bay desde e clientelismo exaspera te e peor delitonan di cueyo blanco cu ta wordo cometi den e esferanan di mas halto di e bida politico y empresarial di e paisnan.
  3. Adicionalmente, nos ta haya e factornan cu ta deriva di caracteristicanan di e sistema di partidonan, locual algun autor ta yama “e problema di institucionalizacion”. Ban compronde esaki como partidonan cu no tin un bida mas leu di e periodo electoral; partidonan cu ta wordo confundi cu empresa of cu ta parce tin doño; partidonan sin plataforma ideologico y pragmatico cla; y partidonan sin debate interno.
  4. Finalmente, mi ta desea di menciona e aspectonan relativo na e naturaleza y organizacion di e partidonan, kiermen e democratizacion interno, su organizacion y su cohesion, entre otro. Asina pues, nos ta haya partidonan cu poco democracia of nulo; e falta di metodonan renova pa e ascenso di generacionnan nobo; partidonan cu mas ta parce un makinaria electoral cu institucionnan permanente di transformacion; partidonan cu un structura organizativo nacional, teritorial y sectorial debil; y partidonan sin programa di formacion di kader.

Esakinan ta, sin duda, algun factor cu ta incidiendo directamente riba nos sistemanan democratico generando, den algun caso, experencianan neo populista di resultadonan tristo, den henter America Latina y cu, a la postre” lo por pone na peligro e propio democracia cu tanto trabao a tuma hopi pais pa alcanza.

Lo mi laga pa un di dos ocasion e parti di e desafionan di e partidonan politico como respuesta na e crisis aki, cu ciertamente, ta mustra diferencianan di un pais pa otro, pero cu ta laga cla cu tin elementonan comun y transversal cu ta atendando contra e mesun sistema.

- Advertisement -

DUNA COMENTARIO

Please enter your comment!
Please enter your name here