Home Hudicial Cuatro aña di prison exigi pa homber cu brutalmente a maltrata y...

Cuatro aña di prison exigi pa homber cu brutalmente a maltrata y viola su compañante

685
0
SHARE
- Advertisement -

ORANJESTAD (AAN): Diabierna mainta e homber Colombiano biba na Aruba, S. a presenta dilanti Hues pa responde pa e acusacionnan serio cu Fiscal a presenta den Corte contra dje. Tabata increibel pa scucha con brutal y baho S. tabata maltrata su compañante. Fiscal a exigi 4 aña di prison.

ACUSACIONNAN:

Den sala di Corte tabata presente e victima acompaña pa familiar y tambe familiar di e sospechoso. E acusacionnan cu Fiscal a lesa den Corte contra S. ta cu riba e anochi di 15 pa 16 di Mei 2017, el a viola e dama victima na un forma hopi brutal.

Tambe Fiscal ta acusa S. cu entre 25 y 29 di April 2017, el a maltrata diferente biaha na forma hopi brutal e dama y force tene relacion .

MALTRATO:

Hues a dicidi cuminsa cu e maltratonan cu a tuma lugar promer cu e violacion. Hues a tene cuenta cu e victima tabata presente y pesey a haci un resumen di tur e maltratonan y abusonan brutal cu S. a haci. Ora tabata scucha Hues menciona e formanan di maltrato, tabata parce mas bien cu S. tabata tortura e victima y tabata trat’e manera un cacho caminda hasta el a forza e victima come for di ariba vloer y orina riba dje.

Segun Hues tabata lesa parti di e maltratonan y abusonan cu S. a haci, mas y mas bo tabata haya e imagen di un burdugo sinta dilanti Hues. E sospechoso tabata maltrata e victima formal. Den Corte e tabata bisa cu no ta asina pero Hues a confront’e cu su declaracion na Polis caminda el a admiti di a maltrata e victima masha brutal mes.

Ora cu Hues tabata lesa esakinan, e tabata sacudi cabez. Hues a puntr’e si loke el a lesa ta cuadra cu e berdad. Segun S. no ta tur cos ta berdad. El a bisa cu e no a dal sino a pusha.

  1. na dado momento a bisa Hues cu e ta lamenta loke el a haci.

VIOLA:

Hues a mustra cu dia 15 Mei pa 16 Mei 2017, con S. tabata mas bien tortura e victima y hasta tabata haci esaki dilanti nan yiu chikito. Por a ripara cu mientras cu Hues tabata lesa e relato di Polis, e victima tabata yora.

Pa duna un imagen chikito di tur e tortura cu e victima a pasa aden, Hues na dado momento a describi con S. a benta cuminda cu e victima a prepara p’e y a obliga e victima pa haci vloer limpi cu su boca. Mientras cu e victima, kende a worde maltrata riba dje, tabata haci vloer limpi cu su boca, e bordugo S. tabata orina riba dje.

E burdugo S. a bay asina leu cu el a obliga e victima pa bebe su orina tambe. Despues el a forza e victima pa tin relacion sexual cun’e y na forma hopi brutal e tabata abusa di e victima.

  1. a bisa Hues cu e no a viola P. y no a forza e dama tene relacion sexual.

Desde 18 Mei 2017 e ta sera den KIA. S. a bisa Hues cu despues di Sali for di KIA, nunca mas e lo bay haci algo asina. E kier bay tin un mihor bida. El a bisa cu ora e sali e lo bay pidi e victima sorry.

EXIGENCIA DI FISCAL:

Fiscal a bisa cu e ta haya tur dos acusacion legalmente proba. El a bisa cu na Polis, e sospechoso a admiti cu el a maltrata e dama y tambe cu el a abusa di e dama.

Na opinion di Fiscal, awor S. ta purba suavisa loke el a haci.

Fiscal a bisa cu e no tin ningun motibo pa duda den declaracion di e victima. Mientras cu Fiscal tabata papia, por a mira cu e victima tabata yora. Fiscal a bisa cu e victima tabata morto spanta di S. y no tabata nenga nada cu S. bis’e pa haci. Fiscal a condena totalmente con S. a maltrata y rebaha e victima. El a mustra cu e victima a keda afecta y ta bou tratamento di un psycologo.

Fiscal a remarca cu S. ta bisa cu ta duele pero na mesun momento ta bisa cu e no a haci tur loke e victima ta bisa. E kier laga mustra manera cu ta e victima ta gaña. Fiscal a bisa cu e no ta kere cu despues cu S. Sali for di KIA, ni e victima y su yiu lo kier mir’e. Fiscal a mustra tambe cu e mucha a mira kico tur S. a haci cu su mama. E no ta kere cu nan lo bay lubida esaki. Pa cu castigo, Fiscal a tene cuenta cu ta first offender. El a bisa Hues cu e ta tene cuenta cu no ta promer biaha cu a maltrata e dama. Ta door cu esaki a bay completo for di man e victima a bay haci denuncia. Fiscal a enfatisa den forma rabia cu ningun hende merece di worde trata di e forma aki. El a exigi 4 aña di prison pa S.

DEFENSA:

Abogado mr. Mohamed a bisa cu no por papia bon di e caso aki. E ta un caso hopi serio. S. mes no por bisa pakico el a actua asina. El a bisa cu e psycologo di KIA a evalua S. cu ta papia di trauma tempo cu e tabata mucha. E a mira su mama worde maltrata door di su partner. E ta kere cu S. lo mester bay traha riba su explosivo caracter. E ta bayendo citanan cu psycologo y psycologo ta mira cambio.

El a bisa cu diferente biaha S. tabata pensa pa mata su mes. E abogado a mustra cu e pareha tabatin problema pa basta tempo. S. ta sufriendo pasobra e no ta mira su yiu. El a bisa Hues cu e ta compronde cu e castigo ta halto pero a pidi Hues pa tene cuenta cu e situacion di S. S. a pidi e victima sorry den Corte y a bisa cu manera Fiscal a bisa cu e victima no kier wak’e mas, e lo percura pa e victima no mir’e mas.

Hues a sera tratamento di e caso y a bisa cu dia 24 November 2017 lo tin sentencia.

 

- Advertisement -

DUNA COMENTARIO

Please enter your comment!
Please enter your name here