Home Cultura Departamento di Cultura y Fundacion Museo Arubano a participa den Aruba Certification...

Departamento di Cultura y Fundacion Museo Arubano a participa den Aruba Certification Program

15
0
SHARE
- Advertisement -

ORANJESTAD  (AAN):  Dia 3 di november 2017 Aruba Certification Program a completa su training cu miembronan di organisacionnan cultural clave di Departamento di Cultura (DCA) y Fundacion Museo Arubano (FMA).

E sesionnan a tuma luga na edificio di Stichting Monumenten Fonds Aruba (SMFA). E sesionnan tabata importante y sumamente interactivo cu e meta pa intercambia informacion valioso di e sector cultural y e sector turistico entre partnernan menciona.

Di parti di ACP por bisa cu ta hopi contento di por a brinda e training, pa motibo cu banda di por a duna informacion, ACP a ricibi informacion tambe di DCA y FMA. Temanan clave cu a bin dilanti ta e importancia di incorpora informacion cultural den curiculo di scol y crea conscientisacion serca e bishitante tocante  Aruba  su herencia.

Esaki cu e meta pa crea aprecio y respet serca e comunidad internacional y nacional ora ta trata Aruba den su totalidad y como producto turistico. Esaki ta e forma optimal pa Aruba mantene su posicion competitivo den mercado turistico, esta enfocando riba ken nos ta y locual nos tin.

Den e mesun sesionnan a para keto tambe na e aspecto di servicio excelente y importancia di ta hospitalario. Elementonan basico pa cu esaki ta informacion corecto y consistente, comunicacion eficiente y tambe un bon actitud. E feedback ricibi di e participantenan tabata sumamente positivo.

E team di ACP ta encurasha comunidad completo pa ta informa di metanan di Departamento di Cultura como tambe Fundacion Museo Arubano. Asina por bishita e museonan di FMA y motiva nos bishitantenan pa haci esaki. Den otro banda por tuma contacto cu DCA pa asina tin bista riba kico ta encera maneho di sector cultural.

Un palabra di danki ta bay na tur participante di DCA, incluyendo esnan cu a sigui curso den july 2017 y gerencia, como tambe e team completo di FMA  pa a comparti cu Aruba Certification Program.

Bo kier sigui curso di ACP? Bishita nan Facebook como tambe  www.acp.aw 

- Advertisement -

DUNA COMENTARIO

Please enter your comment!
Please enter your name here