DOW a bisa cu nan mes lo bay drecha klinker malo den Havenstraat

ORANJESTAD (AAN): E proyecto di Tram na Aruba a costa riba di 32 miyon Florin.  Pa cumpra 4 tram so, el costa 10 miyon.  Pues e resto, cu ta 22 miyon Florin, a bay pa e infrastructura di pone rails, pone klinkers, landscaping, y drecha caminda den Havenstraat.

Pero tur chofer cu a pasa ultimo lunanan den Havenstraat, tabata pensa cu mihor Gobierno a pidi su placa bek.  A paga 32 miyon Florin, y e caminda aki ta di asina mal estado?

“Ora mi core riba Havenstraat, mi ta sinti con e shocks di mi auto ta sclama di dolor, y ami mes den auto ta sacudi comosifuera ta un Temblor di Scala 12 mi ta pasando aden.

Si bo mira e potretnan aki, e trabao a wordo mal haci.  Y awor pa sorpresa di tur hende, ta DOW mes lo saca placa di su cartera pa bay drecha e pida caminda aki.  Hopi raro cu no a exigi nada di e contratista original pa drecha e porkeria di trabao cu el a haci.

DOW a revela riba Diaranzon, cu entrante Diahuebs 9 di November 2017, pa 9’or di mainta te cu 20 di november 2017 lo bay cera Havenstraat completamente pa 11 dia largo.

E motibo ta cu lo bay drecha e caminda menciona. E ceramento lo ta for di e crusada di Zara te final di Royal Plaza y e desviacionnan lo keda indica cu baricadanan y borchinan di aviso.

En conexion cu e trabaonan menciona Departamento di Obra Publico ta haci un peticion na tur automobilista pa tene cuenta cu e cambionan den trafico y ta pidi pa tene cuenta cu e inconveniencianan.

Ta di spera cu DOW pone un fundeshi di concrete bao di e pida caminda, pa asina despues di algun tempo vehiculonan pisa no bolbe pasa y pone e klinkernan aki sak.