DOW y Comision di Calamidad a tuma pasonan pa salba Bubali Plas

    272
    0
    SHARE
    - Advertisement -

    ORANJESTAD(AAN) — Diabierna mainta pa 8or DOW a haya un yamada di Brandweer alertando cu tin posibilidad cu fuel lo por bay drenta den e instalacionnan di e planta di purificacion di awa na RWZI Bubali. Esaki ta pa motibo di un incidente di derame di diesel cu a surgi na Dr. Horacio Oduber

    Hospital mas trempan. Inmediatamente DOW a activa e crisis team pa drenta den accion y cuminsa investiga y tuma e pasonan necesario pa reduci riesgonan di impacto na Bubali Plas y nos medio ambiente en general.

    DOW a mobilisa su hendenan na e pompstation mas cerca di hospital pa aki contene e diesel pa e no yega planta di purificacion di Bubali. Inicialmente no a haya holor e diesel na e planta na Bubali, sinembargo un rato despues na planta na Bubali a nota e promer señalnan di fuel cu a cuminsa manifesta su mes por medio di e holor di e fuel, pues e diesel a yega e planta pero no den e plas di Bubali ainda.

    Na e momento ey a activa e “Vacuum Trucksnan” pa cuminsa saca e awa contamina cu e fuel for di e planta. Nos ingenieronan rapidamente a haci un investigacion y a constata cu no tabata tin señal di fuel ainda den e parti final di procesacion di e planta.

    Tambe a tuma contacto cu un compania specialisa riba tereno di contaminacion pa por entrega e product di FFT, cual ta un producto cu ta combati efectonan di fuel den awa. Esaki a ser aplica na e pompstation di Costa Linda y na e entrada di e planta RWZI na Bubali.

    Mientras cu tur e pasonan aki tabata ser tuma e Vacuum Trucks tabata transportando non stop e awa di riool contamina cu e diesel pa basha esaki den e “droogbedden” cu ta structuranan grandi di concreto cu por contene e awa pa despues e evapora. Sinembargo pa 4or di atardi e team di DOW atendiendo cu e calamidad a constata cu no obstante e esfuersonan realisa toch diesel a drenta logra drenta e canal pa bay na Bubali plas cual ta menasa seriamente e sanctuario.

    Na e momento ey contacto a ser tuma cu e Ministro infrastructura demisionario y alaves e Ministro di infrastructura y medio ambiente entrante pa pone nan na altura di e situacion cu a bira mas critico. E decision cu a ser tuma ta pa haci e maximo esfuerso pa salba Bubali Plas.

    Esey ta encera pa usa mas equipo y personal pa sigui saca tur e awa contamina di diesel y yena e droogbedden completo y uza tur otro pos disponible pa mas awa contamina no drenta e sanctuario di parha y pisca. E commission di calamidad a reuni y ta supervisando e esfuersonan aki. Durante e siguiente oranan y si ta necesario dia e esfuerso maximo aki lo ta tumando lugar.

     

     

     

    - Advertisement -

    DUNA COMENTARIO

    Please enter your comment!
    Please enter your name here