Home Parlamento Durante reunion di Parlatino a firma acuerdo tocante “prisonnan sostenible”

Durante reunion di Parlatino a firma acuerdo tocante “prisonnan sostenible”

23
0
SHARE
- Advertisement -

Parlamentario Rocco Tjon:

ORANJESTAD (AAN) – Parlamentario Rocco Tjon, durante e conferencia di prensa di Fraccion di MEP, a elabora riba e reunion di Parlatino, na cual el a asisti como parti di Aruba su delegacion di Staten.

E reunion di Parlatino a tuma lugar siman pasa, na Panama, unda a trata e tema “Integridad y Corupcion” y cu e parlamentario kier pa pueblo tambe sa e resultado di esaki.

Parlamentario Rocco Tjon a splica cu, manera ta conoci, tin diferente comision ta reuni den Parlatino y den e esaki e Comision di Derecho Humano, Husticia y Politica Carcelario tabata hopi interesante unda tin palabracionnan di principio cu a wordo concreta y Parlamento lo percura pa e diferente acuerdonan wordo hancra den e comisionnan fiho cu tin den Staten.

Por ehemplo, a wordo palabra pa yega na un manera pa bin cu prisonnan sostenible. “Mi ta kere esaki ta un punto hopi interesante pa nos tambe, pasobra un prison manera nos conoce, hopi lihe si no inverti manera mester ta, nos ta trapa riba derechonan humano”, e Parlamentario a subraya.

E parlamentario ta haya importante pa na Aruba tambe yega na prison sostenible den e totalidad di e palabra, pa asina por percura pa e gastonan cu ta mara na mantene un prison of tur e standardnan cu mester tin, por wordo baha tambe.

El a subraya cu esaki ta un punto hopi importante y tambe pa no solamente manera ta e caso aworaki, cu practicamente Aruba ta depende di Inspeccion di Hulanda cu ta bin wak di e prison ta adecua.

El a sigui bisa cu atravez di e comisionnan aki, lo por percura pa tin comisionnan mas cerca den nos mesun vecindario cu lo por zorg constantemente pa nos prison wordo monitorea, y tambe dune e atencion cu e merece.

Parlamentario Rocco Tjon a señala cu ora di papia di inversion di prison, no ta solamente e aspecto di infrastructura sino muy en particular tambe, inversionnan den personal pa nan obtene e material adecua pa nan por haci nan trabao manera mester ta.

E parlamentario ta considera cu un acuerdo hopi importante a wordo cera akinan durante encuentro di Parlatino.

Seguidamente, Parlamentario Rocco Tjon a elabora riba e otro tema trata den un foro interregional, cu tambe el a haya hopi interesante, titula: “Transparencia y lucha contra corupcion”. Den otro articulo lo elabora tocante e tema aki.

 

 

- Advertisement -

DUNA COMENTARIO

Please enter your comment!
Please enter your name here