Home General E anochi di KvK dedica na e comerciante femenino tabata exitoso

E anochi di KvK dedica na e comerciante femenino tabata exitoso

55
0
SHARE
- Advertisement -

ORANJESTAD (AAN): Diaranson, 15 di november ultimo, a tuma luga e segundo evento “Women in Business” organiza door di Camara di Comercio y Industria Aruba (KvK). E evento a tuma luga na Ventanas del Mar na Tierra del Sol y tabata uno completamente sold out. Un bunita anochi cu tabata domina pa e presencia di e ser femenino, indicando e gran interes pa siña mas di otro y asina sigui crece comercialmente.

Cu e atencion riba e hende muhe empresarial, diferente orador a bay comparti nan experiencia y di e forma aki inspira y motiva tur esnan presente. Señora Sandy Odor, e unico miembro femenino di Directiva di KvK a duna un caluroso bon bini na tur presente sigui pa señora Sonja Velthuizen, Directora di KvK y señora Michelle de Groot, Directora di ATIA.

E panel di orador tabata uno hopi varia yena di experiencia. Señora Evelyn Wever-Croes, como keynote speaker, a inicia e anochi cu e topico di e rol di hende muhe den politica. Señora Gerella Roberts-Vrolijk a duna un presentacion encuanto crea oportunidadnan pa hende muhe den e mercado laboral y tuma liderasgo riba diferente posicionnan importante den nos comunidad. Señora Charisse Hoen-Daly a elabora riba e poder cu combersacion por tin riba loke bo kier logra. Señora Lindy Croes a conta di su experiencia y con el a pusha su mes pa logra su metanan. Señora Gina Habibe-Arendsz a splica kico bo tin cu haci pa por ta exitoso como empresario. Señora Rosetty Eleanora a conta con pa bo ta un ‘boss lady’. Señora Candy Rasmijn-Reino y señora Sharleen Tromp a elabora riba con bo por crece ora bo traha hunto y e caminda pa bo ta conecta cu otro.

Despues di e ultimo presentacion a sigui e sesion di network caminda tur esnan presente a haya e oportunidad di combersa riba e topiconan treci dilanti y cera amistad nobo.

KvK kier a gradici tur e oradornan y e MC Joase-Ann van der Biest cu a contribui na e anochi exitoso aki. Palabranan di danki ta bay na e sponsornan: Tierra del Sol, Elite Productions, Connect PR, Penha, ATIA, Organik by Rexa, Refineria di Aruba, Carmen Steffens y Promotional Merchandise Aruba. Un danki tambe na Perfect Team y Aruba Trading pa nan colaboracion pa haci e di dos evento “Women in Business” uno exitoso.

Parti di e suma ricibi di benta di carchi lo ser otorga na un instancia caricativo. E instancia cu lo ricibi e donacion lo worde anuncia den dianan binidero.

Otro aña siguramente KvK lo continua cu e di tercer edicion di Women in Business. E interes pa e evento aki tabata asina grandi cu mester a desapunta hopi damas. Pesey KvK lo evalua pa busca un localidad cu por aloca un grupo mas grandi. Di e forma aki esnan cu no a logra haya carchi por ta presente na e siguiente “Women in Business” di KvK.

- Advertisement -

DUNA COMENTARIO

Please enter your comment!
Please enter your name here