Home Actividad Especial E evento ta tuma lugar dia 25 di november proximo: Arion Wine...

E evento ta tuma lugar dia 25 di november proximo: Arion Wine Company a selecta e miho rosé pa e ‘Rose All Day’ di Renaissance Aruba Resort

154
0
SHARE
- Advertisement -

ORANJESTAD (AAN): Den preparacion pa ‘Rose All Day’ cu ta tuma lugar diasabra dia 25 di november proximo den Wilhelmina park sr. Govert van der Hout di Arion Wine Company a elabora riba e diferente biñanan cu nan a scoge pa e evento unico aki. ‘Rose All Day’ di Renaissance Aruba Resort & Casino lo ta un atardi pa anochi di relahamiento, bon musica, amistad y dushi rosé. Di acuerdo cu Van der Hout, nan a scoge e Sweet Relax Pink Rosé, e Dry Whispering Angel Rosé y e Bollinger Champagne Rosé pa e evento; di e manera ey ta complace tur smaak. “Nos a scoge e 3 biñanan aki pa sigura cu e evento por complace tur hende ofreciendo diferente opcion. Sweet Relax Pink Rosé di Alemania pa tur cu ta disfruta di un biña zoet, pa e rosé mas seco nos a scoge e rosé mas popular na mundo actualmente, cu ta e Whispering Angel y claro pa tur cu ta disfruta di e sparkling wine nos a scoge Rosé Champagne for di e cas di Bollinger, Francia”.

E ‘Rose All Day’ ta tuma lugar riba diasabra dia 25 di november proximo den Wilhelmina park for di 5:30PM. E actividad estilo di picnik sigur lo sa di bay hala hopi atencion. Renaissance Aruba ta conoci pa innova y crea evento cu conceptonan internacional pa Aruba, cu resultadonan exitoso. Papiando di biñanan cu lo ta obtenibel durante ‘Rose All Day’, Van der Hout a sigui splica cu algun aña atras, e gran mayoria gustado di biña na Aruba tabata scoge pa biñanan mas zoet. “Loke nos ta experiencia awendia ta cu nos hendenan local ta birando un poco mas aventurero y ta durf mas tanto pa purba diferente estilo di biña. E White Zinfandel y e Moscato tabata dos di e biñanan mas gusta, recientemente peticion pa biñanan manera Merlot, Pinot Noir, Malbec, Chardonnay, Pinot Grigio, y Sauvignon Blanc a crece inmensamente.”

Pa diasabra dia 25 di november, bo mester imagina, un bista estilo Central Park, NY na unda cu residentenan di e gran ciudad ta sali nan cas cu un ‘blanket’, cos di come y un boter di Rosé friu pa baha calor mientras cu ta combersa y estrecha lasonan di amistad. ‘Rose All Day’ lo percura pa e experencia ey. Un biento fresco y streanan pa ilumina shelo, mientras Dj Rustica y Dj Joa Salas ta percura pa dushi musica. Hunto cu Arion Wine Company a selecta e miho rosé pa ‘Rose All Day’ cada un di nan ta pas perfectamente cu e bitesnan cu a keda inclui den e pakete pa 2 persona.

Renaissance Aruba Resort & Casino tin un ‘macutu’ ideal pa tur hende cu ta inclui un ‘blanket’, bites y 1 boter pa comparti; scoge entre e Relax Sweet Rosé Basket pa $55, e Whispering Angel Dry Rosé Basket pa $65 of e Bollinger Rosé Champagne Basket pa $135. Ta recomenda pa cumpra bo carchi early bird adelanta na cualke navigator desk den lobby di Renaissance hotel of na Arion Wine Company na Ponton te cu dia 22 di november proximo. *Prijsnan menciona ta earlybird. Durante di e actividad lo tin un bar na unda por paga efectivo pa mas cos di bebe y come. Pa mas informacion di ‘Rose All Day’, por yama 523-6115 of bishita e pagina di facebook di Renaissance Aruba Resort & Casino. Dresscode pa e evento aki lo ta blanco of ros.

- Advertisement -

DUNA COMENTARIO

Please enter your comment!
Please enter your name here