Home Social E prome baby di New Bed Tower di Hospital a nace

E prome baby di New Bed Tower di Hospital a nace

70
0
SHARE
- Advertisement -

ORANJESTAD   (AAN): Diahuebs mainta e prome baby di e New Bed Tower a nace y e ta un mucha muhe. E mayornan Rayza Rogers y Ernesto Baron-Lugo tabata contento cu e yegada di nan yiu Inari Emylain Baron-Lugo y alabes feliz cu e ta e prome baby cu a nace den Hospital su New Bed Tower.

Manager di Communicatie & Voorlichting, Charlaine Alexander-Huntington, a duna di conoce cu a ricibi e yamada cu e prome baby di e New Bed Tower a nace. Den e ultimo simannan a muda pa bay den e edificio nobo, di cual recientemente e departamento di emergencia y maternidad su turno a yega. Esaki ta un celebracion extra, pasobra e dia despues di a muda e prome baby a nace den e toren nobo. Hospital ta celebra baby di aña y a tuma e oportunidad aki pa celebra e nacemento di e prome baby den e toren nobo.

Team presente tabata hopi entusiasma y tabata uno grandi, di cual nan ta contento cu nan facilidad nobo y mas espacioso. Compara cu e cambernan di antes, e camber di e toren nobo ta mas moderno cu colornan light y esaki ta haci e mayornan mas trankil p’e momento di duna luz. Den e toren nobo tin e camber unda cu e baby ta drumi cu e mama, e ta espacioso y priva y tur cos ta eynan mes. “Nos ta contento pasobra e prome baby a nace y e mayor ta super contento” asina el a duna di conoce. Pa hospital esaki ta un satisfaccion cu nan a haci un bon trabou cu e departamento di maternidad.

Gynaecoloog, dr. Frank Ho-Kang-You, tabata e dokter cu tabata presente durante e parto di baby Inari. E experiencia di dr. Ho-Kang-You di e parto den e New Bed Tower tabata increibel. Tur cos tabata nobo y hendenan tabata sa unda e cosnan tabata. E baby a nace bon y tabata un parto natural, el a duna di conoce. E nurse tabata entusiasma pasobra esaki tabata e prome parto den e edificio nobo y tur hende a gusta.

E mama Rayza Rodgers a duna di conoce cu e parto tabata uno doloroso pero bunita. Pa loke ta e camber el a gusta esaki y pasa oranan largo cu dolor sperando riba e yegada di Inari. Diahuebs pa 7:35 di mainta Inari a nace y a pisa 6.5 liber. Despues di hopi aña Rayza Rodgers a haya su di dos yiu y a duna di conoce cu e experiencia tabata hopi otro. Un di e diferencia entre e edificio bieu y nobo tabata e espacio, tambe tabatin mas cosnan pa yuda durante e parto. “Mi a gust’e y ta contento cu e cambio”, asina Rayza Rodgers a duna di conoce.

- Advertisement -

DUNA COMENTARIO

Please enter your comment!
Please enter your name here