Home Parlamento E ta garantiza pueblo cu MEP lo no para e proyecto di...

E ta garantiza pueblo cu MEP lo no para e proyecto di hospital

55
0
SHARE
- Advertisement -

Glenbert Croes Parlamentario:

ORANJESTAD (AAN) – Parlamentario Glenbert Croes, di fraccion di Partido MEP, den conferencia di prensa Diaranzon mainta a elabora riba e di dos punto di agenda cual tema ta e debate encuanto e proyecto di Hospital.

Un reunion cu a sigui diaranzon atardi. Croes a expresa cu e fraccion di MEP a keda gratamente asombra cu e sinceridad, cu nan ta sinti, den minister Schwengle su contestanan, unda e ta mustra cu el a realiza na final di su gestion como minister di Salud Publico y na final di ocho aña di gobernacion di AVP, cu tin cosnan cu por a bay fout.

Parlamentario Glenbert Croes a expresa cu e mandatario (demisionario) a indica cu ora el a yega a haya hopi cos cla caba. “Y mi kier pa tur hende envolvi cu ta den SOGA, AIB, Hospital, banconan contratista, arkitectonan realiza cu nos meta como MEP, y mi ta sigur cu ta e meta di e partidonan cu ta forma e coalicion nobo, esta MEP-POR-RED, cu nos meta hamas ta pa para e proyecto. Nos kier pa nos pueblo haya su hospital nobo, pero nos kier pa ta un hospital di e mihor calidad posible pa e balor di e placa cu ta wordo inverti den e proyecto aki”, Glenbert Croes a subraya.

E parlamentario a agrega cu MEP tabata hopi critico den e proceso di destaho publico, y nan ta kere cu esaki a wordo “gefix”. Awor, como parti di e mayoria nobo den Parlamento, MEP ta bay pidi un investigacion independiente di henter e procedure di con e destaho a bay, y e motibo di esaki ta pasobra nan no kier pa e erornan aki ripiti.

E parlamentario a remarca cu les mester wordo saca ora cu proyectonan cu placa di pueblo ta wordo realiza.

El a splica cu gobierno di AVP a crea e structura di SOGA cu ta un Stichting, y supuestamente esaki por desvia di e reglanan di contabilidad, cu ley ta exigi, pa destaho publico.

Ora tin destaho publico esaki mester ta transparente, basa riba decisionnan husto y ora di forma un Stichting e ta bira un proposito specifico, of un vehiculo cu e proposito specifico di realiza un proyecto pero no ta pa desvia di e reglanan di bon gobernacion den e proceso di destaho publico. E ta pa purba elimina e parti di burocracia pa e procesonan por anda mas lihe. “Pero sopi den pura ta sali salo y tin ora bo no por bay pura di mas”, Croes a señala y a subraya cu no ta un cos a bay robes pero varios, den e proyecto aki.

- Advertisement -

DUNA COMENTARIO

Please enter your comment!
Please enter your name here