Home Hudicial Entre 2 y 6 aña di prison exigi pa grupo cu a...

Entre 2 y 6 aña di prison exigi pa grupo cu a haci asalto arma na joyeria den Havenstraat

84
0
SHARE
- Advertisement -

ORANJESTAD  (AAN) – Ayera mainta Corte den Promer Instancia a trata e caso penal cu Ministerio Publico a cuminsa contra un grupo cu ta sospecha di a haci e asalto arma dia 31 di Maart na Kevin Jewelry den Havenstraat. E sospechosonan ta e homber D.A., M.P. y e trio Venezolano L.R.S., A.C.P. y A.V.Z. Fiscal a haya e grupo aki culpable y a exigi castigonan cu ta varia entre 2 aña y 6 aña di prison.

E sospechoso D.A., dialuna a presenta den Corte como sospechoso di e asalto arma na oficina auxiliar di Gobierno na Savaneta. Dialuna a scucha Fiscal bisa cu a exigi 5 pa tur y a kere cu A.D. tambe. Sinembargo ayera mainta Fiscal a bisa cu pa e caso di asalto arma riba e oficina auxiliar di Gobierno, e ta pidi pa declara D.A. liber pasobra no tin suficiente prueba.

Pa loke ta e acusacion contra D.A. di intento di mata, caminda na Januari 2017 e lo a tira riba un homber F., Fiscal a pidi pa declara D.A. tambe liber pasobra no tin prueba. Ta solamente e declaracion di F. tin contra D.A. Ta asina cu F. a bisa cu D.A. a tira riba e cas unda e tabata. Fiscal ta haya cu esaki no ta suficiente prueba.

Den sala di Corte tabata presente e manager di Kevin y e empleada R., kendenan a bira victima di e asalto arma. Ta asina cu R. a demanda 15 mil florin di daño inmaterial.

 

ASALTO ARMA

Hues a bisa cu dia 22 di Mei 2017, Polis a bay na Kevin Jewelry den Havenstraat, caminda a sosode un asalto arma caminda tres asaltante a menaza esnan den e joyeria cu arma y bay cu un cantidad di joyas. Na e joyeria Polis a haya e manager y dos empleada. Nan a bisa cu tres asaltante a drenta e joyeria. Dos di nan tabata arma y un a pone arma riba un dama. E otro a mara e dama y hib’e patras. Despues un di tres a drenta y menaza otro dama y hib’e patras. Nan a bay cana den e joyeria y bay cu joyas balora na 150 mil florin.

E dama R. a declara cu e tabata den baño ora e asaltantenan a drenta. Ora el a sali nan pone arma riba dje. El a spanta. Nan pone resa tambe. Nan a hib’e partas hunto cu e otronan. E victima R. a reconoce e trio Venezolano A.C.P., A.V.Z. y L.R.S. como e asaltantenan.

 

BIN ARUBA PA HACI ASALTO?

Hues a puntra e Venezolano L.R.S. cu ki intension el a bin Aruba. Segun L.R.S. el a bin pa traha. E, hunto cu e otro dos A.C.P. y A.V.Z. tabata keda den un cas na Tanki Leendert cu e hendenan a hiba nan eynan. El a splica cu el a bin ilegal den un boto Aruba hunto cu A.V.Z. y A.C.P. El a menciona cu ta un tal Juan a trece nan. El a bisa cu e tabata den auto y na dado momento el a hay’e envolvi den e asalto arma. El a admiti di tabatin un arma y cu ta den auto el a haya e arma. Hues a puntr’e kende e persona ta. El a bisa cu e no sa pero e persona tabata Arubiano . El a duna descripcion di e persona na Hues. E ta haya cu e persona a laga nan atras pa nan cuenta. Hues a mustra cu L.R.S. a declara na Polis cu tabatin plan pa haci un otro asalto arma.

 

ARMA Y UN GRANADA DI MAN

Hues a mustra cu ora Polis a haci e razia na e cas hunto cu Arestatie Team, e miembronan di Arestatie Team cu a drenta e cas, a mira cu L.R.S. kier a coy un granada di man cu e tabatin banda di dje hunto cu un arma di candela.

Hues a puntra A.C.P. si ta berdad cu el a bin cu L.R.S. Aruba. El a bisa cu ta berdad y a bin pa traha como metsla. El a bin den un boto como ilegal. E tabata keda den un cas y despues a bay na e cas na Tanki Leendert. E tambe a bisa cu ora e tabata den e auto, el a haya sa cu nan ta bay haci e asalto arma. A.C.P. tambe a bisa cu e chofer di e auto a bisa nan di e asalto y cu e tambe tabatin un arma. El a admiti cu el a saca e arma y a dirigi arma riba e homber. El a bisa cu nan a coy joyas. Tambe a bisa cu tabatin plan pa un otro asalto arma.

A.V.Z. tabata e ultimo asaltante cu a drenta e joyeria. El a admiti di tabata den e boto y a bin como ilegal. El a splica cu door di necesidad pa e situacion malo na Venezuela a bin Aruba y a haci e asalto arma. El a bisa cu despues cu e otro dos a baha, el a bay nan tras.

Hues a mustra cu segun e investigacion, M.P. tabata envolvi den planeamento di e asalto arma. El a bisa Hues cu e declaracion na Polis no ta conta. Nan a bis’e pa papia cu e persona na telefoon y cu e persona ta abogado mr. Illes pero ta resulta cu e no ta e abogado cu kende el a papia. Segun M.P. el a wordo deteni na Tanki Leendert pasobra nan ta sospecha cu e ta envolvi cu R.P., kende ta esun envolvi den e asalto arma na e oficina auxiliar di Gobierno.

Hues a puntr’e si e tabata papia cu D.A. riba e asalto arma. El a bisa cu el a papia cu D.A. pa topa banda di Ling & Sons pasobra D.A. debe un cen.

Hues a interoga D.A., kende tabata core un auto. Por a compronde cu entre D.A. y M.P. tabatin palabracion cu D.A. ta bay cu e Venezolanonan y M.P. lo mester a check pa cumpra un otro auto cual lo a wordo usa pa huy. Hues a puntra D.A. si e conoce e Venezolanonan. El a bisa cu ta promer biaha cu e ta mira nan den sala di Corte. Durante e interogacion por a compronde cu D.A. tabata dal vuelta den Havenstraat den un Honda color blanco.

D.A. na 2015 a wordo condena pa posecion di arma.

 

PENSAMENTO DI FISCAL  

Fiscal a bisa cu pa loke ta e acusacion cu D.A. a tira riba un tal F., a haya huls di bala. E ta haya cu mester declara D.A. liber pasobra ta solamente F. su declaracion tin y no tin pruebanan di sosten. Tambe Fiscal a bisa cu no tin suficiente prueba cu D.A. lo ta envolvi den e asalto arma na oficina auxiliar di Gobierno y ta pidi Hues pa declar’e liber pa esey tambe.

 

CULPABEL

Fiscal a bisa Hues cu e ta haya e grupo culpable di e asalto arma na e joyeria caminda a bay cu un cantidad di joyas balora na 150 mil florin. Fiscal a mustra cu e victima R. a reconoce e tres asaltantenan. E manager tambe a wordo menaza cu arma. Tur tres Venezolano a admiti di a haci asalto arma.

Fiscal a sigui bisa cu riba e camera di seguridad ta mustra e tres asaltantenan y agentenan di Polis a reconoce nan. E sospechoso D.A. ta wordo acusa como complice. Fiscal ta considera cu D.A. a transporta e asaltantenan y a facilita e armanan. Durante e asalto e tabata pasa dilanti di e joyeria den e auto blanco. Ariba e imagennan di e camera di seguridad por a mira e auto pasa tambe. Na opinion di Fiscal, un di e sospechosonan a bisa cu e auto ta parce esun den cual nan a huy for di e joyeria. Fiscal no ta kere cu lo tabatin un auto mesun cos.

Fiscal a mustra cu e tal macamba cu A.V.Z. ta papia di dje, ta D.A. kende a bisa pa yam’e asina. Fiscal ta kere cu e otronan no kier papia. E ta haya cu D.A. tabata esun cu a planea e asalto arma.

 

SCUCHA YAMADANAN

Fiscal a splica cu a scucha yamadanan y cu M.P. mester a busca dos Venezolano na un santana. A scucha combersacionnan con tur e asalto arma mester sosode. Nan tabata papia di Royal Plaza como e di dos lugar pa haci asalto arma. E ora ey Polis a dicidi di actua y a detene nan. Fiscal a mustra cu M.P. mes a bisa na Polis, cu e mester a vigila e joyeria cual e Venezolanonan lo bay asalta.

Tin un otro persona S. cu a wordo deteni, kende tambe a papia di e asalto. Fiscal a mustra tambe e forma di papia den code. Nan tabata papia cu tin tres pisca cu tin cu mira laman. Fiscal ta kere cu aki tabata papia di e tres Venezolanonan cu a yega Aruba. Na opinion di Fiscal, D.A. lo a facilita M.P. placa via di un dama pa asina cumpra un auto cu ta usa pa huy.

Fiscal a mustra cu L.R.S. y A.C.P. tabatin arma. Arestatie Team a drenta cas y L.R.S. a purba coy e granada di man. A.C.P. a para keto y a bisa cu e arma ta di dje pero no e granada di man.

 

DEMANDA DI DAÑO

Fiscal a bisa cu e dama R. a demanda 15 mil florin di daño inmaterial. Fiscal ta haya esaki halto. E ta haya 1500 florin na su lugar.

 

CASTIGO

Fiscal a bisa Hues cu mester manda señal bon cla cu no ta tolera asalto arma na Aruba.

Fiscal a exigi 4 aña di prison pa e Venezolano A.V.Z. Pa M.P. el a exigi 2 aña di prison. Pa e Venezolanonan A.C.P. y L.R.S., Fiscal a bisa cu e ta tene na cuenta cu nan tabatin arma y esey ta pisa mas. El a exigi 6 aña di prison pa nan dos.

Pa loke ta D.A., Fiscal ta haya cu D.A. tabata traha den forma pa no susha su mannan. E ta haya cu D.A. tabata e cabez. El a exigi 7 aña di prison.

Despues di Fiscal e abogadonan a hiba nan defensa. Dentro di tres siman lo por spera sentencia di Hues.

 

- Advertisement -

DUNA COMENTARIO

Please enter your comment!
Please enter your name here