Glenda Hernandez: Aruba tin apenas 1 psiquiatra di mucha
ORANJESTAD (AAN): Dialuna e directornan di Departamento di Asuntonan Social, Bureau Sostenemi, Casa Cuna, Fundacion pa Hende Muher den Dificultad y Voogdijraad a reuni cu Minister di Asuntonan Social Glenbert Croes, relaciona cu e tristo caso di e mucha di 5 aña cu a fayece despues cu e lo a wordo maltrata pa un of mas miembro di su famia.
Durante un conferencia di prensa, e directornan a elabora riba e situacion cu tin na Aruba, cu mester wordo atendi cune.
Glenda Hernandez, directora di Departamento di Asuntonan Social a trece dilanti cu no solamente Aruba ta wordo confronta cu e hecho cu su populacion a crece, sino tambe ta asina cu nos isla ta wordo confronta cu problemanan complica, mientras cu e ayudo cu e instancianan social kier brinda no por wordo brinda, pasobra nan no tin suficiente hende y capacidad pa por hasi esaki na un bon manera.
“Ta lamentable pasobra nos mester bin aworaki hunto, pasobra un mucha homber chikito di 5 aña lamentablemente a fayece”.
“Di otro banda, mi ta kere cu nos por siña di esaki y bin dilanti”.
“Nos ta trahando hunto caba den veld, unda cu pa hopi tempo caba nos tabata bati riba porta ta bisando cu cosnan mester cambia riba tereno social”.
“Awor mi ta kere cu a bira tempo pa cosnan di berdad bay cambia”.
Esaki segun Hernandez, kende a sigui bisa cu esaki no ta un coincidencia.
Un mucha cu wordo maltrata den un famia, mayan ta bira e abusador.
“E mama tambe por ta victima di e violencia cu por a pasa den e cas ey”.
“Hopi biaha bo ta haya cu stress den un famia pa mantene nan cabez ariba di awa manera ta wordo bisa, ta hasi cu nan ta bay na uso di alcohol y droga, cu hopi biaha ta conduci na varios problema”, segun Hernandez, kende a indica cu asina hopi biaha muchanan ta wordo laga pa nan cuenta.
E tipo di problemanan aki ta pasa di generacion pa generacion.
“Awor como instancianan dentro di un siman nos ta bay traha un plan cu tin consecuencia pa full e veld”.
“Nos no ta traha solamente pa prevencion, pero tambe riba tereno di duna asistencia, cu ta inclui tambe reclassering”.
Esaki segun e director di Departamento di Asuntonan Social, kende a sigui bisa cu nan ta wak buraco den e cuido cu por wordo ofreci, pero door cu no tin e capacidad suficiente, nan ta cu nan man mara na otro.
“Mi ta contento cu minister Glenbert Croes y e gabinete aki ta duna nos e oportunidad pa nos bin cu nos plan, necesidad y ideanan”.
“E solucion no por ta a corto plazo, pasobra falta e capacidad y material pa hasi locual mester wordo hasi”.
“E por bira un mehoracion a medio plazo y a largo plazo”, segun Hernandez.
Prensa a puntra e director si a yega di bati alarma riba por ehempel e falta di personal y el a bisa cu for di basta tempo a hasi esaki caba.
“Nos a mustra riba e hecho cu tin cierto grupo di mucha cu mester di ayudo, mientras cu na Aruba tin apenas 1 psiquiatra pa mucha”.
“Bo ta kere cu bo por bisa un mucha cu tin problema cu su famia pa warda 1 aña riba un lista di espera?”, segun Hernandez.
