Falta di comunicacion den cuerpo policial a crea un confusion rond di cambionan di borchi na waf

    169
    0
    SHARE
    - Advertisement -

    Marlon Croes: D.O.W a actua riba peticion di un agente policial

    ORANJESTAD (AAN): Diahuebs atardi durante un conferencia di prensa, director di D.O.W Marlon Croes a reacciona riba locual a sosode Diaranzon cerca di e salida di waf di crusero, unda cu tour bus operators tabata protesta.

    E tour operators a protesta door cu algun borchi a wordo cambia, di cual nan ta haya cu esaki ta stroba nan den nan trabao.

    Esaki door cu awor nan no por para nan busnan cierto caminda.

    “Cu gran asombro nos a tuma nota di e declaracion di cuerpo policial ayera, unda cu ta menciona cu D.O.W lo a hasi cambionan riba e borchinan di trafico, cu lo a causa tur e problema aki”.

    Esaki segun Croes, kende a indica cu D.O.W no a cambia e borchi riba propio iniciativa.

    D.O.W por hasi esaki ora cu e borchi a bira bieu y mester wordo reemplaza of si un auto a pasa ranca un borchi y e mester wordo reemplaza.

    Un otro motibo pa cambia un borchi ta si D.O.W ta wak cierto desaroyo, door di cual mester cambia un borchi.

    E ora ey ta discuti pa wak si ta cambia e borchi of no.

    “Den e caso specifico aki di waf, agente policial Vos a acerca D.O.W cu e peticion pa cambia dos borchi, pasobra el a wak cu esakinan no ta funciona corectamente”.

    “Door cu semper nos tin un bon relacion cu cuerpo policial, nos a hasi e trabao y e borchi a wordo cambia”, segun Croes, kende ta haya hopi lamentable Diaranzon a Sali afo cu D.O.W a hasi e cambio sin haya autorizacion.

    “Mi ta kere cu akinan tin un problema interno di comunicacion den cuerpo policial, cu mi ta kere nan tin cu atende cune”.

    “Mi ta enfatiza cu nos tin un hopi bon relacion cu cuerpo policial pa loke ta trabaonan cu ta wordo hasi, pero mi ta kere cu nos tin cu tuma contacto cu Alto Comisario, pa establece un protocol con nos ta bay deal cu otro di awor pa dilanti, pa evita e tipo di expresionnan aki cu ta wordo hasi den direccion di nos organizacion”, segun e director di D.O.W.

    - Advertisement -

    DUNA COMENTARIO

    Please enter your comment!
    Please enter your name here