Home Hudicial Homber a bisa Hues cu e mester cana arma pasobra miembronan di...

Homber a bisa Hues cu e mester cana arma pasobra miembronan di gang ta busk’e

195
0
SHARE
- Advertisement -

Hasta den KIA el a wordo amenaza

ORANJESTAD (AAN) – Ayera mainta e homber M.F. a scucha Hues conden’e na 27 luna di prison. Esaki ta 20 luna pa e posesion di e arma di candela y e 7 lunanan condicional pasobra el a bolbe wordo gara cu arma den menos cu dos aña.

Fiscal a bisa Hues cu e acusacion contra M.F. ta cu dia 10 Juni 2017, e tabata den posesion di un arma di candela cu balanan. Fiscal a bisa cu e tabatin un pistol Glock carga cu balanan cla pa tira. Tambe Fiscal a pidi Hues pa ehecuta e castigo condicional di 7 luna di prison pa un caso similar na 2016.

ARMA DI CANDELA

Hues a puntra M.F. si ta berdad cu e tabata arma. Segun M.F. e tabatin e arma pa su proteccion pasobra tin hendenan cu kier haci malo cun’e. Hues a bis’e cu e arma tabata cla pa tira. Segun M.F. e no tabata sa esey. El a bisa cu e tin arma pa si hende atak’e. Hues a bisa cu Polis a bay pasobra hende a bisa cu el a wordo menaza cu arma. Segun M.F. no ta berdad. E persona a bisa cu e sospechoso tabatin un paña camouflage bisti. M.F. a bisa cu e tabata forma parti di un gang pero no mas y awor miembronan di gang lo ta su tras. Hues a bisa cu aña pasa caba M.F. a wordo condena pa posecion di arma na 15 luna di prison di cual 7 luna ta condicional cu un tempo di prueba di 2 aña.

Hues a puntr’e unda el a haya e arma y cu e arma ta costoso. El a bisa cu el a haya e arma for di un bon amigo y e no kier bay hinca e persona den e asunto aki. Dia cu Polis a detene, e tabata bou influencia di alcohol.

EXIGENCIA DI FISCAL

Fiscal a bisa cu e ta haya legalmente proba cu M.F. tabatin un arma cu balanan. Hende a yama bisa Polis cu el a wordo menaza cu arma door di un persona bisti den paña camouflage. Fiscal a bisa cu e arma ta e serie mas chikito special pa por cana cun’e scondi, esta un Glock 26.

Pa cu e castigo, Fiscal a bisa cu e ta tene cuenta cu M.F. tabatin e arma riba caminda publico. E arma tabata cla pa tira. Fiscal a sigui bisa cu M.F. a mustra e arma na un persona y e persona tabata sinti su mes amenaza.

Na opinion di Fiscal, na Februari 2016 a condena M.F. pa posecion di arma di candela y awor e ta bolbe haci mesun cos den su tempo prueba. Fiscal a splica cu normal ta exigi 15 luna di prison pero ora ta trata di recidivista ta castigo ta bira mas. El a exigi 22 luna di prison y pa pone acerca e 7 luna condicional. El a exigi pa destrui e arma y balanan.

MENAZA DEN KIA

Abogado mr. Thielman a bisa Hues cu su cliente M.F. a admiti di tabatin un arma. Sinembargo e no ta di acuerdo cu e exigencia di Fiscal. E abogado a mustra cu M.F. a bisa cu e tabatin e arma pa defende su mes pasobra su bida ta core peliger. Den KIA tambe e ta teme pa su bida. El a wordo menaza den KIA pa otro miembronan. E abogado a bisa Hues cu M.F. tin miedo di cana den KIA caminda no tin vigilancia.

Segun e abogado, ta malo cu M.F. tin un arma pero e tin asina miedo cu nan lo tir’e. Mirando cu M.F. a nace na Hulanda y diferente biaha a bin establece na Aruba y bay bek Hulanda, e abogado a bisa Hues cu M.F. kier bay bek Hulanda pa aleha di tur esnan cu ta menace. El a puntra Fiscal si e por bay sinta su castigo na Hulanda.

Fiscal a bisa cu di parti di M.F. mester haci un peticion pa bay Hulanda. Tin e posibilidadnan ora ta trata di menaza entre otro.

SENTENCIA

Hues a bisa cu e ta dicta sentencia di biaha. El a mustra cu M.F. a admiti y ta un caso hopi serio. Hues a mustra cu posesion di arma di candela ta causa inseguridad den comunidad y ta wordo castiga severo. Ta asina cu hopi arma di candela ta wordo usa riba nos isla. Hues a mustra cu M.F. tabatin e arma riba lugar publico. E arma tabata cla pa tira y a mustra e arma na un persona. Na opinion di Hues, M.F. ta bisa cu e tabatin e arma pa defende su mes pero esey no ta hustifica cu e por cana cu un arma cla pa tira na lugar publico.

Hues a sigui bisa cu recientemente M.F. a wordo condena pa mesun posesion di arma. Esey no a yuda pa e stop di cana arma. Hues ta haya cu mester pone castigo severo y pone e castigo condicional acerca. Hues a condena M.F. na 20 luna di prison y tambe pa pone acerca e 7 lunanan condicional. Esey ta nifica cu en total M.F. mester sinta 27 luna di prison, kitando e tempo cu e ta sera caba. E arma y balanan lo wordo destrui.

 

- Advertisement -

DUNA COMENTARIO

Please enter your comment!
Please enter your name here