Home Hudicial Homber a maltrata dama y na su cas a haya cantidad di...

Homber a maltrata dama y na su cas a haya cantidad di droga y motorcyclenan horta for di Hulanda

169
0
SHARE
- Advertisement -

ORANJESTAD (AAN): Aunke cu e sospechoso G.K. ta bisa cu e tabata burachi ora el a yega na apartamento di e dama y cu e no sa cu e motorcyclenan tabata horta, Fiscal ta hay’e culpable di 4 di e 6 acusacionnan y a exigi 22 luna di prison.

SEIS ACUSACION

Fiscal a bisa Hues cu tin 6 acusacion contra G.K.

Fiscal a cuminsa cu G.K. a menaza cu morto e dama R. entre 23 Juli 2017 y 1 Augustus 2017. Tambe ta acusa G.K. di a dal e dama diferente biaha mokete den cara riba 23 Juli 2017.

Fiscal a sigui cu G.K. tabata den posecion di cocaine y marihuana entre 7 y 10 Augustus 2017 y cu dia 11 Maart 2017 a haya cu marihuana.

Tambe Fiscal ta acusa G.K. di posecion di un bala cayente entre 7 y 10 Augustus 2017.

Tambe cu entre 26 Juni 2016 y 10 Augustus 2017, G.K. tabatin dos motocicleta procedente di ladronicia di Hulanda.

MENAZA DI MORTO

Hues a cuminsa cu e caso di menaza y maltrato. El a mustra cu segun procesverbaal di Polis, e dama R. a declara cu el a sali anochi y ora el a yega cas, el a wordo maltrata door di G.K. Na dado momento el a huy for di cas y a bay na bisiña y a yama Polis. Polis a bay na e cas y e dama a wordo hiba hospital caminda a constata slanan na cara y curpa.

G.K. a admiti di a maltrata e dama R. E dama a mustra Polis cu despues di a haya su cellular bek, G.K. a menaza e dama R. cu morto. Segun G.K. e dia ey el a Sali anochi y a bebe y a bay na e apartamento y a lanta R. for di soño. El a puntr’e unda e tabata. A surgi discusion y G.K. a bisa cu el a dal R. cu man habri. E no a pensa cu el a dal R. asina duro. Hues a puntra pakico el a dal R. Segun G.K., e tabata rabia y burachi. Hues a remarca cu mirando e slanan na cara, wowo hopi hincha e ta duda cu G.K. a dal cu man habri sino cu mokete. Segun G.K. si el a dal R. cu mokete e lo a kibra su cara. E ta para riba cu ta cu man habri el a dal e dama R.

DROGA

A base di loke a sosode, cu permiso di Huez Comisario, Polis a bay haci investigacion na G.K. su cas. Polis a bay 10 Augustus 2017 y a haya cantidad di marihuana y parti di un bloki di cocaine den un auto. Tambe a confisca 3 motocicleta y 2 auto. Tambe a haya un bala cayente. En total a confisca 659 gram di cocaina y 413 gram di marihuana. Segun G.K. e auto no ta core y nan tabata warda cosnan den e auto. El a bisa cu e no sa di e bloki di cocaine. El a bisa cu tin hopi hende ta bay na e cas. El a bisa cu eynan ta bende ticket pa bay natural pool.

Segun G.K. e tabata sera caba ora cu Polis a bay haci investigacion na e cas. E no sa nada di e cocaine den auto. Pa loke ta marihuana, el a bisa cu e ta huma marihuana y su famianan tambe ta huma marihuana.

El a bisa tambe cu e no sa nada di bala cayente cu a haya na e cas. E ta kere cu e bala ta di hopi tempo pasa. Hues a remarca cu riba su cel tin hopi potret di arma. Segun G.K. hopi hende ta mand’e potretnan di arma y e ta haya bunita pa mira. Hues a mustr’e un tas riba potret y el a bisa cu e no sa di dje.

MOTORCYCLE HORTA

Dos di e motorcyclenan ta procedente di ladronicia for di Hulanda. Polis for di G.K. su cellular por a conclui cu G.K. tabata papia di e motorcyclenan horta for di Hulanda. Hues a remarca cu den G.K. su cellular a haya potret di e motorcyclenan horta, a haya combersacion y a haya dos motorcycle na su cas.  Segun G.K. el a cumpra e motocyclenan aki na Aruba y no sa di nada.

Dia 11 Maart 2017, Polis a par’e y e tabatin 10 gram di marihuana. Segun G.K. e tabata pa su mesun uso.

Hues a mustra cu na 2012 a condena G.K. pa menaza, na 2010 a condena G.K. pa posecion di dos arma. Tambe G.K. a wordo condena pa forma parti di grupo cu tabata dedica na hortamento di cantidad di auto. Segun G.K. el a cambia su bida y no ta anda cu nan mas.

EXIGENCIA DI FISCAL

Fiscal a bisa cu den Corte, G.K. ta mustra cu e ta bayendo den bon caminda pero segun e acusacionnan ta mustra cu no ta asina. Na opinion di Fiscal, G.K. a maltrata e dama R. door cu R. a bay sali anochi sin su permiso. Tambe G.K. a menaza e dama cu morto. Fiscal a bisa cu G.K. a admiti esakinan tambe. Fiscal a mustra cu pa oranan largo G.K. a maltrata e dama y esaki tabata premedita. Fiscal ta haya cu G.K. a bay e apartamento y warda e dama yega.

Fiscal a sigui cu a haya 659 gram di cocaine den un auto na cas di G.K. Esaki tabata forma parti di un bloki di cocaine cu a haya resto di e material cu tabata empaketa den e auto. Na opinion di Fiscal, a haya e mesun bloki di cocaine su potret den cellular di G.K. Esaki ta mustra cu ta G.K. ta doño di e bloki di cocaine.

A haya diferente caminda den e cas marihuana. En total 413 gram a keda confisca. Fiscal a bisa Hues cu no por determina cu e droga aki ta di G.K. pasobra a haya diferente parti na cas. Pesey Fiscal a pidi Hues pa declara G.K. liber di esaki. Fiscal a mustra cu tin mas hende ta keda na e cas y ta bira dificil pa determina cuanto di e cantidad realmente lo ta di G.K. Tambe e bala cayente cu a haya el a pidi pa declara G.K. liber.

Pa loke ta e motorcyclenan, 2 ta procedente di Hulanda y hasta tabatin number Hulandes ariba nan. Fiscal a mustra cu den pasado caba G.K. tabata sera pa hortamento di vehiculonan y a keda condena na 2010. Na 2012 a condena G.K. tambe pa incubrimento.

Na opinion di Fiscal, G.K. ta bisa cu el a cumpra e motorcyclenan for di un persona pero no kier menciona nomber. Esaki ta mustra cu e kier tapa pa otro. Fiscal ta haya G.K. culpable di incubrimento. El a mustra cu G.K. tabata dos biaha na Hulanda.

Fiscal a mustra cu segun maneho di Ministerio Publico, mester exigi castigo severo mirando cu G.K. ta un residivista. El a exigi 22 luna di prison pa tur e delitonan.

ABOGADO

Mr. Crouch a bisa cu G.K. a admiti di a maltrata e dama R. y menaza. E no ta comparti punto di Fiscal cu tabata premedita. El a bisa cu G.K. a bay e cas y tabatin discussion y cos a bay for di man. El a cuestiona e hecho cu innecesariamente a bay haci investigacion na e cas di G.K.

Hues a sera tratamento di e caso y a bisa cu dia 1 December 2017 lo tin sentencia.

 

- Advertisement -

DUNA COMENTARIO

Please enter your comment!
Please enter your name here