Home Social Hopi biaha cosnan ta wordo teni scondi y hasta famianan cerca no...

Hopi biaha cosnan ta wordo teni scondi y hasta famianan cerca no ta na altura di kico ta pasando

690
0
SHARE
- Advertisement -

Director di Voogdijraad:

ORANJESTAD  (AAN): Un di e instancianan cu Dialuna a reuni cu Minister di Asuntonan Social Glenbert Croes relaciona cu e caso lamentable di morto di un mucha di 5 aña, tabata Voogdijraad.

Durante un conferencia di prensa Dialuna atardi director di Voogdijraad Aisca Berkemeyer a trece dilanti cu ta hopi tristo cu un mucha mester a perde su bida na e manera aki, mientras cu esunnan primordial cu mester a dune e seguridad pa lanta den un hogar safe, esta e mayornan, a faya den esaki.

“Di nos banda mi ta kere cu esaki ta un caso cu ta pone nos tur den un estado pa bay refleha riba kico nos tur por a brinda den un mihor forma”.

“Como instancianan tambe nos ta refleha riba kico nos por a hasi differente, pa toch acapara e problematica aki”.

Esaki segun e director di Voogdijraad, kende a sigui bisa cu e problema ta asina grandi cu nan no por atende cu  cada caso di mucha di Aruba, cu ta haya su mes confronta cu un mayor cu durante un temporada no ta capaz of disponibel pa dune e cuido necesario.

Esaki no por wordo hasi cu e apenas 13 hende cu ta trahando den e departamento ey.

“Nos a haya ayudo den sentido di automatizacion entre otro, pero e problema principal pa nos ta ora cu bo tin un mucha cu ta wordo maltrata y tin cu sake for di su cas, mientras cu no tin un lugar pa hibe”.

“Tin tres instancia unda cu por ubica un menor, esta na Casa Cuna, Imeldahof of na Ortopedagogisch Centrum, dependiendo di nan edad”.

“Sinembargo, hopi biaha e espacio no tey pa duna e mucha ayudo”.

Esaki segun Berkemeyer, kende a indica cu lamentablemente tin muchanan cu ta keda den un situacion precario, unda cu Voogdijraad por monitor esaki un rato, pero bo no por yuda tur e 200 muchanan cu ta cay bao di Voogdijraad.

“Nos tur ta hasi nos esfuerzo, pero nos tur por yega  na unda nos por yega”.

“Nos ta sinti falta di personal y hopi hende ta puntra kico Voogdijraad por of ta hasi, pero si un hende yega na e decision pa hasi daño na su mesun yiu of miembro di famia, ta algo cu nos niun por yega y drenta den mente di e persona ey pa percura pa e no sosode”, segun e director di Voogdijraad.

El a sigui bisa cu hopi biaha cosnan ta wordo teni scondi, unda cu te hasta famianan cerca no ta na altura di kico ta pasando.

 

- Advertisement -

DUNA COMENTARIO

Please enter your comment!
Please enter your name here