Home Parlamento Hospital su proyecto ta yen di duda

Hospital su proyecto ta yen di duda

142
0
SHARE
- Advertisement -

Evelyn Wever Croes ta convenci cu

ORANJESTAD (AAN): Parlamento e siman aki a trata e proyecto di hospital. Den su presentacion e lider di MEP a trece varios punto padilanti relaciona cu e proyecto aki.

“Durante e parlamento anterior caba e dudanan aki a worde expresa na varios ocasion, pero e mayoria den e parlamento biew no kier a haci caso di e dudanan. Awor nos tin un Parlamento nobo cu ta bisa loke e ta haci y ta haci loke e ta bisa, y kier mas transparencia.

E parlamento nobo aki kier un investigacion riguroso di e proyecto pa atende cu tur duda. Si e investigacion prueba cu no tin motibo pa preocupa, nos lo ta e prome nan pa admiti esey. Si no ta asina, mester investiga y esnan responsabel, mester carga nan responsabilidad. Un minister tin un responsabilidad personal tambe riba dje!

Manera ta conosi na 2013 gobierno a ‘bende’ na Stichting Onroerend Goed Aruba (SOGA) e tereno di hospital.  Esey a wordo haci, pa SOGA renoba y expande e hospital. Condicion tabata cu gobierno ta paga 24 miyon Florin anual na huur na SOGA. Gobierno di AVP a otorga e proyecto na un compania amigo di nan, cu a bid pa e prijs mas halto, y cu menos experiencia. Esaki a crea hopi duda.

E proyecto ta dudoso pa varios motibo, pa menciona algun: (1) A scohe esun cu a ofrece e prijs mas halto, 40 miyon mas halto, (2) A scohe esun cu a claim pa cobra ‘meerwerk’ en bes di esun cu a duna un prijs fiho y garantisa, (3) A scohe esun cu menos experiencia, y menos capacidad.

Cu esaki por a premira e problemanan cu awor nos ta pasando aden.

Pa por a paga e gastonan adicional di e proyecto gobierno di AVP a bin cu e medidanan conosi como health tax: e health tax di 1% na december 2014 y 2% na juni 2015, y mirando e problemanan financiero serio cu gabinete Mike Eman a laga Aruba aden, cu un deficit den presupuesto di 195 miyon, CAFT ta conseha pa hisa e health tax aki mas ainda. Y tur esaki ta sin tene cuenta cu e gastonan EXTRA di 83 miyon, y cu ta sigui aumenta.

Despues di un tempo, a crea mas duda na momento cu a anuncia cu e proyecto costoso aki no ta duna ni un kamber extra. Mas duda a worde crea ora a resulta cu algun parti esencial no tabata inclui den e proyecto: sala di operacion, intensive care units, y esaki ta haci e gastonan extra total 83 miyon Florin, sin interes. SOGA kier cubri e gastonan aki, pero kier pa gobierno aumenta e huur cu 5 miyon Florin pa aña, dus e huur ta bay bira 29 miyon Florin cu gobierno mester paga tur aña na SOGA pa e hospital aki.

Huridicamente e conseheronan a bisa cu si bo lesa e contrato literalmente, e minister por hisa e prijs di huur sin pidi aprobacion di Parlamento prome, y e minister a haci esey tambe. E minister a manda informa Parlamento si, y e Parlamento anterior a acepta e procedura aki. Sinembargo e Parlamento nobo tin un otro posicion, y no ta di acuerdo cu e forma con e Parlamento anterior a atende cu e tema importante y costoso aki. Principalmente pa e falta di transparencia. Importante den e caso aki ta cu di e forma aki gobierno ta aumenta e gasto total di e proyecto cu mas di 30%, sin mester di aprobacion di Parlamento. Esaki ta algo cu e Parlamento nobo no por acepta sin mas, y pa e motibo aki a yama minister Schwengle pa duna cuenta y ta exigi un investigacion prome”, segun Evelyn Wever-Croes

 

- Advertisement -

DUNA COMENTARIO

Please enter your comment!
Please enter your name here