Home Hudicial Husticia ta exigi 3 aña di prison pa mishimento di pecho di...

Husticia ta exigi 3 aña di prison pa mishimento di pecho di un dama y solamente 28 luna pa violacion di un mucha?

2706
0
SHARE
- Advertisement -

E exigencianan di Fiscal ta crea pregunta

ORANJESTAD (AAN): Diabierna ultimo, DIARIO a keda asombra cu e exigencianan di e mesun Fiscal den dos caso lamentable. Ta trata aki di un caso cu ta relaciona cu un dama Hulandes cu tabata kedando Aruba pa pasantia y a spierta haya un homber riba su cama.

Durante un luchamento e homber a mishi cu e dama su pechonan. E dama mes a bisa cu no tabatin relacion sexual.

E otro caso ta relaciona cu un mucha muher di 12 aña cu a worde viola pa un homber di 26 aña y un otro homber mas. El a worde busca na biblioteca y e homber hunto cu un amigo a bay cu e mucha na un apartamento y a viol’e y despues a bisa e mucha cu su amigo tambe mester tene relacion sexual cun’e.

DIARIO a haya straño cu pa e promer caso Fiscal a exigi 3 aña di prison y pa e di dos caso 28 luna di prison. DIARIO a papia cu diferente abogado pa haya sa nan comentario pa mira si DIARIO lo ta robez of no. Ta resulta cu e abogadonan enberdad ta duna DIARIO razon cu e exigencianan ta crea preguntanan.

EXIGENCIANAN:

Di tur e añanan cu ta cubri casonan di Corte, a compronde cu cada caso ta diferente. Sinembargo, den e dos casonan aki ta crea e pregunta, pakico pa un mishimento di pecho ta exigi 3 aña di prison y pa un caso di violacion di un mucha di 12 aña, ta exigi 28 luna di prison.

Na opinion di DIARIO, tur dos caso ta serio pero e caso di violacion ta mucho mas serio cu e caso di mishimento. E caso di mishimento ta worde considera como actonan inmoral. Den casonan di inmoralidad cu muchanan menor di edad, caminda tabatin mishimento na partinan intimo, hopi biaha e castigonan exigi pa Fiscal, ta varia entre 15 luna y 24 luna di prison.

Un caso di violacion ta un caso hopi mas serio cu un caso di inmoralidad. Un mucha di 12 aña ta worde viola y hopi biaha ta den casonan asina por spera exigencianan pisa di Fiscal manera 3 aña di prison bay ariba. Hopi biaha Ministerio Publico ta mustra cu e victimanan ta keda afecta pa resto di nan bida.

Den e promer caso hasta abogado a reclama cu Fiscal ta exagera den castigo. Fiscal su reaccion tabata cu aki ta tene cuenta cu e sospechoso a drenta den e cas di e dama y cu e dama lo keda cu un experiencia amargo di su bishita na Aruba. Den combersacion cu algun abogado, nan a expresa cu nan ta haya straño cu pa un caso di mishimento ta exigi asina hopi castigo y un caso di violacion e exigencia ta menos.

Otro siman Hues lo dicta sentencia y lo ta interesante pa mira kico Hues mes ta  pensa di e casonan. DIARIO lo informa lectornan di e sentencianan aki.

 

- Advertisement -

DUNA COMENTARIO

Please enter your comment!
Please enter your name here