Home Parlamento Infrastructura pa haci deporte a bay completamente atras

Infrastructura pa haci deporte a bay completamente atras

17
0
SHARE
- Advertisement -

Parlamentario Edgar Vrolijk:

ORANJESTAD (AAN) – E tema di deporte tambe tabata un punto cu Parlamentario sr. Edgar Vrolijk, di fraccion di MEP, a trece dilanti den conferencia di prensa.

E parlamentario a menciona cu aunke e ta un lastima, ta un realidad cu unda nos pasa ta wak muchanan ta haci deporte den veldnan den hopi mal estado.

E ta urgi Minister di Deporte pa duna atencion na esey. El a bisa cu e no ta referi na un bario specifico pasobra e ta di Santa Cruz, pero den tur area rond di Aruba e canchanan deportivo ta den hopi mal condicion y aki mester bay traha riba e infrastructura.

Deporte escolar ta algo cu e tabata envolvi pa 18 aña largo, unda cu Macuarima Scol a logra hopi trofeo den olimpiada internacional, y bira campeonnan di olimpiada escolar, entre otro. Cu deporte, por tene e muchanan bezig y pafo di mal caminda y den gara di loke comunidad mes ta yama perdicion.

E parlamentario a subraya cu e tabata tin e honor di traha cu nan, pero lamentablemente den e ocho añanan cu a pasa tur esey a caba, olimpiada escolar no tey mas, nan ta competi cu un of dos scol, pues e nivel a baha. El a reitera cu infrastructura di deporte a wordo hopi neglisha, locual ta di lamenta, y ora bin peticionnan di afo un deporte cu ta pidi pa un cambio di infrastructura ta ciclismo.

Parlamentario Edgar Vrolijk ta urgi e minister encarga cu deporte pa reorganiza IBISA, mehore y cuminza eynan, pasobra scol mester hunga un rol importante pa nos muchanan por practica otro deportenan tambe. Mester bin leynan pa proteha e ciclistanan pa por core bicicleta. El a referi na un accidente cu a sosode cu un ciclista di afo aki na Aruba. E ta subraya tambe cu automobilistanan tambe mester bira mas conciente. Mester bin leynan cu ta sanciona nan tambe pa proteha e personanan en general cu ta core bicicleta den comunidad.

E hobennan di San Nicolas tambe ta pidi pa drecha e infrastructura pa nan haci deporte, pasobra nan tin cu bin te Playa pa practica Atletismo. Esaki ta na su lugar, y e ta pidi minister di deporte pa mas pronto posible duna atencion na e tereno aki. E ta desea e minister fortaleza pasobra esey ta un area cu tambe a wordo hopi neglisha. E parlamentario mes tey pa dune e ayudo necesario pa nos deporte por florece un biaha mas.

Finalmente, el a subraya cu e ta hopi contento di ta den Parlamento. Fraccion di MEP tin e conocemento y perspectiva pa traha den tur tereno, y nan ta bay controla gobierno sin duda. Pueblo lo nota e diferencia y cambio cu Parlamento number 10 y nan lo ta habri y scucha pueblo. E ta spera cu tur actor ta bin hunto pasobra union ta haci forza, y e mesun forza di pueblo pa logra Status Aparte, ta e forza cu cual lo sali di tur reto cu tin dilanti, cu positivismo.

 

- Advertisement -

DUNA COMENTARIO

Please enter your comment!
Please enter your name here