Home Hudicial Maltrato y Asesinato di un criatura di apenas 5 aña ta bao...

Maltrato y Asesinato di un criatura di apenas 5 aña ta bao investigacion

5100
1
SHARE
- Advertisement -

ORANJESTAD (AAN): Un caso hopi lamentable a bira conoci Diabierna ora cu a cuminza circula informacion relaciona cu e maltrato pisa di un criatura na man di su mayornan.

For di fuentenan fidedigno DIARIO a haya confirmacion cu e criatura, un mucha homber di 5 aña Rishandroh Anastacia, a fayece Diabierna na Hospital como consecuencia di un derame cerebral (hersenbloeding) pa motibo di e golpinan severo cu el a haya.

Doctor mes a informa e instancianan concerni cu e mucha tabata sufri di maltrato for di basta tempo.  Fracturanan/cicatriznan bieu cu a wordo haya na su curpa a constata esaki.

Entre otro, por menciona cu e mucha tabata presenta wesonan/ribchi kibra y tabata tin fracturanan y heridanan bieu. Nunca e mucha a wordo hiba doctor of Hospital pa atende cu esaki.

Segun informacion, e biaha aki si a hiba e mucha doctor. Esaki a sosode diaranzon. E mucha tabata den hopi mal condicion y e tabata tin problema pa hala rosea. Mas leu ainda por a lesa riba un otro publicacion riba social media, cu e mama lo a gaña doctor cu e mucha a cay den un speeltuin, pero doctor mes a bin saca afo kico tabata sosodiendo cu e pober criatura.

E mucha homber a haya golpinan severo cu a ocasion’e un sangramento den su cabez y ademas di esey el a sali positivo na droga (marihuana). Informe adicional cu DIARIO a haya ta cu e mayornan (mama y padrastro) lo tabata droga e mucha.

Banda di esaki, tin fuerte sospecho cu e tata di e mucha tabata kima tambe su pareha (mama di e criatura) y el a hinke na su pia y hende tabata mir’e cana malo. E ora lo por ta papiando tambe akinan di un caso di maltrato di hende muher cu e homber aki lo mester bay duna cuenta p’e.

PARADERO DI OTRO MUCHA

E caso aki tin un rabo largo ya cu a haya sa tambe cu tin otro mucha, cu lo ta ruman di e criatura aki, cu lo ta desapareci. No sa di su paradero. E mucha cu yama Eugene tin 3 aña, segun informacion. Esaki no a keda confirma precis te cu Diabierna atardi. Tin hopi speculacion.

Segun fuentenan ayega na DIARIO, tin sospecho cu e muchanan aki tambe lo por ta victima di maltrato y cu e muchanan lo por a wordo asesina y dera un caminda.

Mientras tanto Autoridad Hudicial a tene razzia Diabierna atardi y anochi mes na 4 adres, pero no a haya e mucha.

DETENCION

Mientrastanto, DIARIO a haya contacto cu vocero di Ministerio Publico, Ann Angela kende a confirma cu e caso ta den man di Ministerio Publico (OM) como tambe di e instancianan concerni.

Diabierna atardi mes a bay den un operativo y a detene e mama di inicial F. y su padrastro di inicial M. Angela a informa tambe cu Fiscal a laga confisca e curpa di e criatura y cu e autopsia lo wordo realiza pronto.

El a subraya cu e investigacion ta andando y cu en berdad, e criatura a drenta hospital Diaranson den un condicion critico, cu lesionnan hopi grave.

DENUNCIA

Finalmente, mester agrega cu e intencion awor ta pa Voogdijraad tambe bay haci un denuncia oficial pa maltrato y asesinato di un criatura inocente.

DIARIO ta expresa palabranan di profundo dolor pa e perdida lamentable aki. Esaki sigur tabata un diabierna scur y un caso cu a laga comunidad den shock ayera.

Riba potret por mira e criatura, como tambe e mama y padrastro cu a keda publica Diabierna riba un facebook page di uso publico hopi conoci aki na Aruba.

- Advertisement -

1 COMMENT

  1. Unda e wela e jufrouw di scolnan unda e dokternan unda e omo tantanan amigo amigann bisinjanan di e jiu ey a keda? 5 aña di abuso alfin la libra pero Dios no ta drumi e plegaria lo bolbe bek pa boso boso tur ta culpabel di e susedido pasobra esun cu seranan wowo y bira nan cara wak otro banda y keda keto ta mes culpabel cu e burdugonan cu a comete e maltrato contra criatura aki.

DUNA COMENTARIO

Please enter your comment!
Please enter your name here