ORANJESTAD (AAN): Pa varios siman durante di e periodo di formacion di Gabinete Evelyne Wever Croes, por a scucha e lider di MEP duna declaracion na prensa, no na un pero na varios occasion, cu su gabinete lo bay conta cu 7 minister back y hasta e pone enfasis riba su determinacion cu ta 7 Minister su gobierno lo tin, cu esunnan cu kier traha cu MEP den gobierno, tin cu acepta esaki of busca un otro partido pa traha cu nan.
Lider di fraccion di AVP sr Marlon Sneek a mustra cu awor cu a forma gobierno di coalicion pueblo ta haya otro mentira caba di e gobierno nobo aki, ya cu no solamente e gobierno di MEP-POR-RED no a baha e cantidad di Ministernan na 7 pero a aumenta esaki na 8 cu oficialmente a huramenta como Minister pero di carambola a hinca un di nuebe Minister aden, cu ta e Minister no huramenta cu lo bay atende cu e cartera di salubridad.
Sr Sneek a mustra bon cla riba e hecho cu tur hende sa di e maniobra haci pa formador Evelyne Wever Croes kende awor ta Minister Presidente di pais Aruba, kende a hiba e mensahe pa pueblo durante di campaña cu nan lo spaar miyones di Florin pa asina financia e fondo di pensioen y uza e placa aki pa otro proyectonan, pero awor ta back na 8 minister y un di carambola.
Mester ta franco y sincero cu pueblo, esta mester bisa lo ta bay haci pero haci tambe loke bo a bisa y aki ya caba por mira cu gobierno di MEP no ta haci loke e lider a bisa ya cu e maniobra di duna Minister Dangui Oduber e cartera di salubridad, tur hende sa cu e mandatario aki no tin ningun conocemento di cuido medio y cu e ministerio aki lo worde atendi y maneha pa e Minister Carambola, dr Vallego.
Ta bon conoci pa henter pueblo cu Minister Dangui Oduber no por sa e diferencia entre ‘paracetamol’ y ‘parasailing’ pa awor diripiente y bay maneha un cartera asina importante y serio manera esun di salubridad publico.
Ta bon acerca segun lider di fraccion di AVP, Marlon Sneek, cu ta e propio Minister Dangui Oduber a presenta un concepto di ley pa cambia e reglamento di eleccion caminda e persona cu tin mas voto, tin derecho di drenta Parlamento pero aki a surgi e problema serio den MEP cu tin candidatonan no kier a entrega nan posicion den Parlamento pa dr Vallego drenta y awor el a worde nombra Minister di Salubridad cu solamente no a huramenta pa carga e responsabilidad aki pero lo bira e ‘stroman’ di Minister Dangui Oduber.
