Home Parlamento Mester mehora deporte organiza, deporte escolar y crea parkenan recreativo den diferente...

Mester mehora deporte organiza, deporte escolar y crea parkenan recreativo den diferente bario

30
0
SHARE
- Advertisement -

Parlamentario Edgard Vrolijk (MEP):

ORANJESTAD (AAN): Bao di Gabinete Evelyn Wever-Croes mester enfoca pa mehora nivel di deporte na Aruba. Den esaki lo mester enfoca riba mehoracion di e infrastructura existente, mas aporte financiero na federacionnan, inverti den material, inverti den upgrading di nos coachnan, mercadeo y  reconocemento di nos atletanan, crea infrastructura nobo pa deportenan cu falta, stimula deporte escolar y enfoca riba parkenan recreativo den barionan.

E punto di bista ta cu actualmente mayoria tereno deportivo ta den un situacion pesimo. Unda bo pasa bo ta wak hobennan ta practica deporte den un ambiente demotivante. Pesey ta urgi Minister di Deporte pa traha un plan di maneho con den e 4 añanan nos dilanti lo percura pa mehora e infrastructura existente combina cu mehoracion den maneho di cada club pa sigura con lo percura pa mantencion di esakinan door di e propio club.

Mester percura pa clubnan cu actualmente tin un bon organizacion pero no tin nan propio tereno y ta usando tereno di otro hende, por haya nan propio tereno y nan por traha riba nan propio infrastructura.

Aporte financiero:

Mayoria di clubnan deportivo ta pasando den hopi dificultad pa por tin material adecua pa por practica deporte.

Mester wak con lo institui Lotto pa Deporte pa asina por garantisa clubnan material y sigur tambe por contribui cu material pa school cu ta hopi necesario y tambe den esaki lo crea fondo pa yuda talentonan pa bay afo y prepara nan mes adecuadamente pa eventonan grandi y tambe pa por duna reconocemento na nos atletanan.

Diferente deporte ta sclama pa hopi tempo caba pa creaccion di infrastructura nobo, manera entre otro e deporte di atletismo cu ta desea nan propio espacio na San Nicolas, deporte di ciclismo (incluyendo Bike Cross) ta pidi nan propio infrastructura.  Pues a yega ora tambe di duna otro deportenan nan debido atencion pa asina nos por yuda nan eleva nan nivel na Aruba y den exterior.

Mercadeo di deporte ta hopi importante pa no solamente pone pueblo na altura pero tambe pa stimula pueblo duna acto di presencia na eventonan deportivo pero tambe pa duna mercadeo na nos atletanan pasobra pami ta mas positivo lanta dialuna wak potret di un hoben sobresaliendo den deporte cu un hoben den medionan di prensa haciendo algo negativo. Nos tin di stimula mas y mas hoben pa haci deporte.

Deporte escolar:

Un reto grandi ta pa reorganiza IBISA y pone hende capacita na e puesto ey unda cu enfoke mester ta pa stimula mas hoben pa haci deporte escolar. Y sigur tambe enfoca riba e parti saludabel y stimula mas movecion den barionan. Den esaki mester percura pa motiva participacion pero tambe eleva e nivel.

Pa esaki mester percura pa schoolnan tin gymzaal apropia y equipa cu material, upgrading di esnan encarga cu deporte y pone premionan atractivo. Banda di esaki mester activa atrobe weganan interinsular y tambe Olimpiada Escolar den un formato nobo pero sigur mas atractivo.

Esaki ta un trend actual cu mas y mas hende kier move y mas y mas hoben kier un lugar unda nan por recrea. Nos ta papia di parkenan funcional unda por cana, haci deporte, muchanan por tin un parke pa por hunga, core bicicleta y durante cierto oranan por haci uso di internet.

Un pensamento acerca ta e posibilidad di crea un espacio cu por sirbi pa duna cursonan y tambe fungi como biblioteca unda nos hobennan por busca buki (kizas digital por print nan na un prijs social) pa asina nan por prepara mihor na school.

Como parlamentario mi lo enfoca sigur pa mehora nos deporte organiza pero tambe pa mehora deporte escolar y tambe creaccion di parkenan recreativo den diferente bario.

- Advertisement -

DUNA COMENTARIO

Please enter your comment!
Please enter your name here