ORANJESTAD (AAN) – Den nomber di Gobierno di Aruba, Minister Otmar Oduber a gradici Minister di Husticia y Cuerpo Policial, cu tabata hopi activo durante e ultimo 48 oranan y prome, ora a notifica e sucedido.
Asina e dignatario a expresa durante rueda di prensa extraordinario di Diadomingo atardi, relaciona cu e caso tristo di morto di un mucha door di maltrato y di su ruman cu ta desapareci.
E dignatario a acentua cu pa Gobierno di Aruba ta hopi importante, den contacto estrecho cu Prome Minister sra. Evelyn Wever-Croes, cu den e circumstancianan di e ultimo oranan, unda tin un noticia cu a shock nos comunidad y ainda tin nos pueblo preocupa y den angustia riba e paradero di su ruman homber chikito, Eugene.
E mandatario a subraya cu nan kier duna comunidad e seguridad cu e investigacion y tambe e buskeda no a para y cu tur hende cu por tin informacion pa mas chikito, cu por ta, pasobra tur detaye ta importante, cualkier cos minimo manera OM y KPA a pidi, wordo duna na autoridad.
Si por a wak e mucha un luna pasa mes, den compania di cierto hende of cualkier otro informacion, un detaye masha chikito (e dignatario a reitera) tur esaki ta importante, y ta wordo acumula y uza pa por continua hunto cu datonan nobo, cu e buskeda di e hobencito cu ta perdi na e momentonan aki.
Di parti di Gobierno di Aruba, minister Oduber a extende palabranan di gratitud na e Comandante di Marina cu ayera merdia a confirma su cooperacion. E dignatario a menciona cu gobierno tabata tin comunicacion directo entre e Secretariat y Ministerraad y Gabinete di Gobernador y Den Haag, pa por a haya den e siguiente 24 oranan tambe cu Marina Real ta mantene su grupo na disposicion di KPA pa yuda den e proceso aki.
E mandatario a subraya cu esaki ta hopi importante pasobra hunto cu e experticio di nos propio hendenan tambe esun di Marina Real, sosteni pa Hulanda y Den Haag ta mustra y ta duna e sosten necesario pa algo cu den nos comunidad ta un drama y cu a shock nos comunidad.
E mandatario ta spera cu, cu e poder di nos Creador por haya e hobencito Eugene na bida, y alomenos por trankiliza tur e resto di e famia cu tambe ta sumamente preocupa na e momentonan aki.
Minister Oduber a bolbe haci un yamada na nos comunidad pa duna informacion cu por tin, y gobierno lo sigui den contacto cu pueblo te ora haya sa e paradero di e hoben aki y comunica esaki na nos comunidad tambe.
E dignatario a reitera cu e tipsnan cu comunidad por duna ta sumamente valioso y el a pidi prensa pa sigui encurasha nos pueblo pa duna informacion, y cada minuut ta importante pasobra e speranza ta wordo carga cu e hobencito aki ta den bida.
MINUUTNAN DI SILENCIO NA SCOLNAN:
Minister Otmar Oduber a duna di conoce cu awe lo tin algun minuut di silencio den tur scol, pa e hobencito cu a fayece victima di maltrato.
