Home Hudicial Mucha muher di 15 aña ta mata su tanta cu veneno di...

Mucha muher di 15 aña ta mata su tanta cu veneno di djaca

6938
0
SHARE
- Advertisement -

Fiscal a exigi e castigo maximo hubenil di 12 luna di prison

ORANJESTAD (AAN): Diahuebs mainta Corte den Promer Instancia a sigui cu tratamento di e caso penal contra e mucha muher S., kende ta worde acusa cu riba 22 di November 2016 intencionalmente a mata su tanta cu veneno di djaca. Fiscal a haya S. culpable y a tene cuenta cu e raport di psycologo cu ta bisa cu S. no ta completo responsabel pa su actonan.

Fiscal, teniendo cuenta cu e mucha tabatin 15 aña ora el a haci e delito hopi serio aki, a exigi e castigo maximo hubenil cu ta 12 luna di prison.

VENENO DI DJACA DEN ORANGE JUICE:

Algun luna pasa e tratamento di e caso aki a cuminsa caminda despues cu Fiscal a bisa e acusacionnan contra S., Hues a bisa cu e caso ta worde trata cu portanan sera ya cu ta un menor di edad.

Mirando e importancia di e caso aki, DIARIO tabatin combersacion cu Corte y mirando cu e redactor semper a cumpli cu palabracionnan haci cu Corte, a dicidi cu e caso ta worde trata cu portanan habri. DIARIO mester atene su mes na a palabracionnan esta cu no ta pone e inicialnan completo di e sospechoso pa asina e identidad keda no conoci.

E acusacionnan cu Fiscal a presenta contra S. ta:

(*) Asesinato di un persona riba 22 di November 2016, caminda intencionalmente S. a pone veneno di djaca den Orange Juice pa e victima, su tanta señora C., bebe cu despues a causa su morto.

(*) Intento di asesinato di un otro persona riba 22 di November 2016, caminda intencionalmente S. a pone veneno di djaca den juice di apelsina, di cual e di dos persona a bebe un glas.

(*) Intento di asesinato di un di tres persona riba 22 di November 2016, caminda intencionalmente S. a pone e veneno di djaca den juice di apelsina, di cual e di tres persona a bebe un glas.

DIARIO a raporta e siman ey, cu potret con dos persona (un homber y un muher) a yega cu Ambulans na Hospital, debi cu nan a bebe veneno, y nan situacion tabata serio.  Pero e dama despues a fayece.

SOSPECHOSO NO KIER PAPIA:

Tratamento di e caso a bay basta fastioso ya cu e sospechoso S. no tabata kier a papia mucho cos. Por a compronde cu el a bin for di Jamaica pa sigui estudio. E motibo cu el a bin Aruba ta pasobra cu el a bira victima di abuso sexual door di tres homber. E sospechoso a bisa Hues cu e no kier papia pasobra e no ta confia.

E tabatin un experiencia cu el a conta un familiar un cos y e familiar a graba loke el a bisa.

Ta asina cu na dado momento, parce cu S. su consenshi lo tabata remord’e, y el a bisa Hues cu e ta dispuesto di papia pero sin prensa presente. E momento ey prensa mester a sali y despues a bolbe pa sigui cubri e caso.

EXIGENCIA DI FISCAL:

Fiscal a bisa Hues cu e ta haya legalmente proba cu S., intencionalmente y premedita a benta veneno di djaca den un paki di juice di apelsina cu consecuencia cu tres persona a bebe esaki y cu e tanta cu S., señora C. a fayece.

Premedita a prepara e veneno: Fiscal a mustra cu dia 21 di November 2016, S. a bay na un supermercado na San Nicolas y a pidi pa veneno di djaca. A mustr’e cu tin e veneno den “korrels”. El a puntra si no tin esaki den puiro. Na opinion di Fiscal, esaki ta mustra claramente cu S. tabatin planea caba pa tira veneno den e Orange Juice y tabata kier e puiro cu ta disolve mas liher compara cu e “korrels”.

Fiscal a bisa Hues cu e hecho cu psycologo ta mustra cu e sospechoso S. no ta completo responsabel pa su actonan, no ta kita afor cu el a haci esaki premedita.

A mata su tanta: Fiscal ta haya cu door cu S. a benta veneno di djaca den e juice di apelsina y e tanta C. a bebe di e juice, esaki a causa cu C. a fayece.

Kico tabata e motibo: Na opinion di Fiscal, no ta mucho cla, kico exactamente tabata e motibo cu S. a benta veneno di djaca den e juice di apelsina. El a mustra cu for di investigacion, un testigo a bisa cu el a puntra S. pakico el a benta veneno di djaca den e juice di apelasina pa e tanta C. S. a bisa e testigo aki, door cu e tanta C. cada biaha ta kinipi’e na su man y tabata dal’e. Tin grabacion di video di interogacion caminda S. ta bisa cu door di e maltratonan aki, el a benta e veneno di djaca den e juice di apelsina.

Fiscal a mustra tambe cu tin un otro testigo kende ta bisa cu e motibo cu S. a venena su tanta C. ta pasobra e tanta C. a nenga di pone algo valioso ariba nomber di S.

Castigo hubenil: Fiscal a bisa Hues, cu pa cu e castigo, e ta tene cuenta cu e raport di psycologo cu ta bisa cu S. no ta completo responsabel pa su actonan y cu e chens di ripiti ta existi. Tambe Fiscal a bisa cu e ta tene cuenta cu tempo cu S. a venena su tanta e tabatin 15 aña. Esey ta haci cu Fiscal a opta pa usa e ley hubenil cu tin un castigo maximo di 12 luna di prison. Fiscal a exigi e 12 luna di prison pa S.

Awor Hues ta bay evalua e caso y dia 23 di November lo por spera sentencia.

 

- Advertisement -

DUNA COMENTARIO

Please enter your comment!
Please enter your name here