Home Gobierno “Na e momentonan aki Aruba tin un crisis social nacional”

“Na e momentonan aki Aruba tin un crisis social nacional”

635
0
SHARE
- Advertisement -

Minister Glenbert Croes:

ORANJESTAD (AAN) — Minister di Asunto Social, señor Glenbert Croes,  ta considera cu nada no a ser haci te aworaki, pa tuma accion tocante e problemanan social cu ta existi den nos comunidad.

Den entrevista cu nos redaccion, e dignatario a subraya cu esey ta haci cu mester busca solucionnan pa e problemanan social cu ta biba den nos sociedad.

E minister a haci un yamada, hunto cu su coleganan, den nomber di gobierno y e comunidad, cu ta preocupa cu mas caso, ya cu tin hopi mas caso, manera esun cu tin nos pueblo conmociona na e momentonan aki.

“Tin e caso di Sarahi y ta cuanto mas di e casonan aki tin cu ta pasando na e momentonan aki, scondi pa conocemento di nos comunidad. Cuanto mas di e casonan aki mester pasa, pa nos como comunidad, nos tur cu mester duna un man no bira cara otro banda, no cera wowo, nos orea y nos boca”, e mandatario a expresa.

Den e caso aki, nan tabata tin casi dos luna cu nan no tabata bay scol y tur hende a keda keto. Tur como comunidad tin e responsabilidad cu nos kier bay sanea, salba Aruba di e problemanan social grave cu nos ta den. Minister Glenbert Croes a subraya cu Aruba tin un crisis social nacional. “Nos tur mester duna un man. Di parti di gobierno, pa loke ta trata e caso aki, den apenas seis dia na trabou y e Conseho di Minister extraordinario a keda convoca.

“Tur minister ta riba e caso aki, y Minister Presidente tabata den contacto cu tur e ministernan. E minister a pidi Directie Sociale Zaken pa informa su persona di loke nan ta haciendo. Ta bay tin reunionnan cu tur instancia cu ta bou auspicio, responsabilidad di Sociale Zaken. No por keda grita ora algo a bay for di man, ya cu ya caba ta laat. Mester busca un manera pa detecta y preveni casonan asina” e mandatario a expresa.

El a agrega cu nos mester cuminza actua y e minister ta enfatisa cu no por keda keto, e comunidad mester ta activo. “Si bo alerta un cos, cu resalta cu no ta berdad, perfecto. Pero kizas bo alerta a preveni algo peor. No punta dede riba un hende, pero riba nos tur.

Kico gobierno ta haciendo? Cu e convocacion di dialuna, pa tene un minuut di silencio, nos mester cende bombiyo den nos consenshi como pueblo, pa haci algo diferente. Pasobra si cos sigui manera cu e ta bay, mas lo sigui su tras. Cosnan cu lo sali na luz publico. Cuanto caso lo tin cu no ta sali na luz publico, cu ta keda secreto? Tur hende mester actua: tata, mama, yiunan, rumannan, famia, bisiña, cu bo ta ‘hole” algo. Si a resulta cu no ta nada, Danki Dios, pero kizas bo alerta por a conduci na algo.

P’esey mes gobierno kier manda un seña na henter e pueblo y comunidad. Pa gobierno, esaki ta algo inaceptable, cu ta un caso mas. No ta bay ta indiferente. Nos ta bay bisa e cos aki, gobierno ta bay actua diferente, pa un resultado diferente, pa salba bida y futuro di nos muchanan. Esaki tabata un baby…”, e dignatario a remarca.

El a sigui splica cu tur minister y gobierno den su totalidad ta actuando. Tur minister mester traha hunto y esey gobierno ta haciendo. Si esun cu den su cabes por a cruza pa haci maldad, e minister a bisa cu nan tin e oportunidad di haci un bida nobo. Reflexiona.

“Gobierno lo asumi e rol pa ta un di dos mama, un di dos tata. Esun cu no kier asumi responsabilidad pa nan yiunan, gobierno no por bisa cu no tin placa. Esaki ta non sense! Gobierno mester asumi e rol di mama y tata. Esaki ta un problema grave, uno serio. No por sinta papia bunita y haci nada. Ta tempo pa actua!

Directora di Sociale Zaken, ta investigando y den cooperacion cu Ministerio Publico pa cu e caso specifico aki. Den cuanto hogar tin hendenan cu ta wordo abusa? Mamanan, of hobennan cu ta abusa di nan mayornan. Ta problema serio tin pa atende. Loke gobierno kier mustra, ta cu e ta bay tuma e asunto aki, increiblemente na serio”, ta palabranan di Minister Glenbert Croes, titular di Asuntonan Social.

 

- Advertisement -

DUNA COMENTARIO

Please enter your comment!
Please enter your name here