Home Politica Nombramento haci pa gobierno saliente despues di eleccion lo no wordo honra

Nombramento haci pa gobierno saliente despues di eleccion lo no wordo honra

116
0
SHARE
- Advertisement -

Chris Romero, parlamentario di MEP:

ORANJESTAD (AAN)—Dialuna mainta Partido Movimiento Electoral di Pueblo, a tene su conferencia di prensa den su sede na Santa Cruz. A hiba palabra Parlamentario Chris Romero.

Chris Romero a comenta cu for di diferente medio di comunicacion tin yen di storia ta sali afo, entre otro, cu tin varios nombramento ta tumando lugar den e aparato publico, door di e Gobierno saliente of demisionario.

Nan ta nombrando ex-coordinadornan, consehero y sostenedornan, den diferente departamento.

“Mi kier trece dilanti duidelijk cu nos no ta contra ni un di e nombramentonan aki, pero si ta un lastima cu tin e posibilidad grandi cu e nombramentonan aki no ta bay wordo honra, pa motibo cu hopi di nan a sosode despues di eleccion”, Parlamentario Chris Romero a expresa.

“Mi ta puntra mi mes, con responsable un gobierno por ta, pa haci esaki? E tabata ocho aña na mando y awor cu cos a cambia, bo ta bin haci esaki na ultimo, a sabiendas cu esaki ta ilegal”, Romero a agrega.

E Parlamentario a agrega cu tambe por lesa den media, vooral facebook, un NV cu a sali rond unda e minister di transporte awor demisionario, dia 27 di September 2017 a kibra un moratorio encuanto taxistanan, cu ta data di 3 di Juli 2015. Kiermen, cinco dia despues di un eleccion.

Esaki ta nifica cu e minister demisionario en cuestion a aumenta e cantidad di taxista di 450 pa 500 sin cu a haci e estudionan necesario of bin cu argumentonan cu por hustifica esaki.

Romero a subraya cu si acerca e taxistanan mes papia cu nan, por ripara cu nan ta pasando den dificultad e temponan aki y tin cu core oranan largo (extra) pa asina por yega na un entrada cu nan por sobrevivi di dje.

E parlamentario ta califica esaki como un acto hopi iresponsable y el a acentua cu Gobierno di MEP ta bay honra e moratorio existente caba, pasobra no ta asina sin mas cu despues di eleccion ta bin haci un acto ilegal, cu cual no solamente ta perhudica e taxistanan sino tambe e minister nobo di transporte, ken ta bay haya su mes cu e problema, djis pa a acomoda cierto coordinadornan.

E parlamentario a comenta cu te ora haci estudio y trece argumentonan valido, lo por ta den futuro, MEP lo pensa pa habri e moratorio.

Esaki, el a indica, ta conta tambe pa e departamentonan na unda nombramentonan ilegal a tuma lugar. Romero a reitera cu esaki ta un acto hopi iresponsable di e gobierno saliente, y e ta sigur cu e gobierno nobo lo evalua nan y si no ta necesario, lamentablemente e nombramentonan aki tampoco lo wordo honra. E ta haya hopi di lamenta cu un gobierno saliente, awor demisionario, ta engaña e personanan concerni y haci comosifuera esaki ta legal.

 

- Advertisement -

DUNA COMENTARIO

Please enter your comment!
Please enter your name here