Home Social “Nos tin cu stop di acepta violencia y nos tur tin cu...

“Nos tin cu stop di acepta violencia y nos tur tin cu ta parti di e solucion”

23
0
SHARE
- Advertisement -

Presidente di Fundacion pa Hende Muher den Dificultad:

ORANJESTAD(AAN):  Despues di e morto tragico di e mucha di 5 aña, kende lo a sucumbi na e heridanan cu el a sufri probablemente na man di esnan cu tabata encarga cu su cuido, Gobierno nobo rapidamente a cuminza move pa atende cu e asunto hopi lamentable aki.

Dialuna Minister di Asuntonan Social Glenbert Croes a reuni cu diferente instancia social, incluyendo  Fundacion pa Hende Muher den Dificultad (FHMD) .

Relaciona cu esaki un conferencia di prensa a tuma lugar, unda cu presidente di FHMD Suzette Kock a trece dilanti cu e ta hopi contento cu FHMD a wordo invita pa ta parti di e combersacion.

“E ta algo cu FHMD tin añanan largo ta luchando pe”.

“No ta facil pa un NGO wordo scucha”.

“Nos no tabata forma parti di e discusion, pero constantemente nos tabata parti di e solucion”.

“Locual cu a pasa y tin nos tur conmovi, tambe ta pertenece na e problema di violencia domestico, pasobra ta dentro di su famia e criatura aki mester a wanta asina hopi sufrimento”.

Esaki segun e presidente di FHMD, kende a sigui bisa cu FHMD tin 6 espacio den cual por yuda un hende muher y su yiunan cu ta yega eynan.

Ora cu nan yega na e instancia, ta ora cu un crisis a tuma lugar, unda cu e muher y/of e yiu a wordo maltrata severamente.

“Un golpi no ta e unico violencia den caso di e muchanan cu ta acompaña e mamanan aki”.

“Ta e bida cu nan a hiba unda cu nan a siña cu violencia ta aceptable, unda cu un mucha homber ta wak tata ta bati mama”.

“Esaki ta locual na dado momento ta manera normal pa e muchanan”.

“Muchanan muher cu ta wak con nan mama ta acepta cu nan ta wordo golpia”.

Esaki segun señora Kock, kende a sigui bisa cu nos tur ta culpable.

“Esey ta na unda nos mester cuminza pa nos por cuminza drecha e problemanan cu tin”.

“Nos tur a faya e mucha y e famia aki, pasobra ningun hende por bisa cu nan no sa nada, of cu nan no a wak nada”.

Esaki segun e director di FHMD, kende a indica cu na un momento of otro un hende mester a wak algo.

El a sigui bisa cu e solucion cu FHMD ta boga pe durante asina tanto aña ta esey, esta cu mester papia.

“Antes tabata tin bisiñanan cu tabata cuida otro”.

“Si bo a bay for di cas nan sa, of si cualkier hende straño aparece na e cas nan ta ripara”.

Esaki segun Kock, kende a sigui bisa cu aworaki hopi di nos ni sa ta ken ta nos bisiñanan, corda pa worry si bo a tende desordo banda di cas of bo a tende un hende grita.

“Nos sociedad a cambia unda cu nos ta acepta violencia, pero ami y tur esnan cu a bin hunto no ta acepta cu esaki ta parti di nos Aruba”, segun Kock.

El a sigui bisa cu naturalmente tur hende ta pidi y ta exigi pa Gobierno hasi esaki y esaya, pero nos tur tin cu hasi algo.

Segun Kock, FHMD tabata tin diferente evento pa duna informacion riba e tipo di problemanan aki, pero no tabata tin mucho interes pa esakinan.

Un di e problemanan tambe cu tin na Aruba ta entre otro falta di espacio pa atende cu e problemanan .

Segun e presidente di FHMD, e cambernan cu nan tin pa yuda hendenan muher den dificultad for di Augustus caba ta yen.

Durante cu e lugar ta yen, tin un lista di espera di hendenan muher cu tin mester di ayudo, pero no por haya esaki na e fundacion e momento ey.

Esey ta un problema grandi pa e personanan cu ta den crisis, despues di a bira victima di entre otro violencia domestico.

- Advertisement -

DUNA COMENTARIO

Please enter your comment!
Please enter your name here