OPI a mustra cu artistanan famoso a hasta copia musica di otro

    57
    0
    SHARE
    - Advertisement -

    Plagiarismo of casualidad

    ORANJESTAD (AAN): Den cuadro di celebracion di 30 aña di existencia, Oficina di Propiedad Intelectual di Aruba ta informa comunidad riba diferente tema relaciona cu ‘Derecho di Autor (Copyrights), Invento (Patent) y Marca (Trademarks). Tin varios caso cu a tuma luga anteriormente, cu ta trata di ‘plagiaat’.

    Ora ta menciona ‘plagiaat’ ta referi na e practica di tuma (fia/piratia of horta) e idea of trabao di un otro persona y laga pasa cu ta di bo mes e ta. Hechonan asina ta pasa hasta cu artistanan famoso y aki ta sigui algun ehempel cu a tuma for di e fuente:  http://bit.ly/2AspU65

    E cantante di ‘Black Eyed Peas’ ‘Will.i.am’ a admiti cu el a yega di comete ‘plagiaat’ cu su cancion ‘Let’s Go’ door di copia parti di e cancion ‘Rebound’ di e ‘House Duo Mat Zo & Arty’.

    ‘Will.i.am’ no ta e unico cu a haya su mes cu problema di ‘plagiaat’. Hasta artistanan grandi, manera entre otro The Beatles, Shakira y Madonna a worde acusa cu nan a comete ‘plagiaat’.

    Johnny Cash a yega di paga Gordon Jenkins un suma grandisimo di placa ora a bira conoci cu Cash a plagia (copia) partinan di Jenkins su cancion ‘Crescent City Blues’ pa su mesun cancion ‘Folsom Prison Blues’.

    E trompetnan na comienso di e cancion ‘Hips Don’t Lie’ di e famoso cantante Shakira ta procedente di e cantante di salsa Jerry Rivera. Un parti di e refrein tambe a ser horta di e cancion ‘Carnaval (Baila en la Calle)’ di e cantante Luis Diaz. Ningun di e dos cantantenan aki a yega di entrega un keho contra Shakira.

    E organizacion Big Seven Music Corp a keha the Beatles na aña 1973, ora e grupo a presta e beat y e texto di Chuck Berry su cancion ‘You Can’t Catch Me’ pa nan cancion ‘Come Together’.
    E caso a ser soluciona sin mester di a bay corte. Pero a cambio John Lennon mester a pone tres cancion di e organizacion riba nan siguiente album. John Lennon no a haci esaki. E organizacion a ricibi 7000 Dollar extra door cu no a cumpli cu e acuerdo.

    E grupo musical ‘Radiohead’ tambe a ser culpa door di ‘The Hollies’ conoci pa e cancion ‘The Air That I Breathe’. The Hollies a haya rason den corte y a bira oficialmente co-autor di e cancion ‘Creep’.

    E Belga Salvatore Acquaviv tambe a yega di entama un caso contra Madonna. Salvatore a afirma cu Madonna a uza su cancion ‘Ma Vie Fout Le Camp’ pa su hit ‘Frozen’. Den e sentencia hues a bisa cu no tabata tin daño di perhuicio, pero a duna un prohibicion pa toca e hit na Belgica.

    Den e caso di ‘The Rolling Stones’ cu nan cancion ‘The Last Time’ y e hit di ‘The Verve’ ‘Bittersweet Symphony’ casi no tabata tin diferencia entre e dos cancionnan aki. Den corte Mick Jagger y Keith Richards a gana e creditonan riba e cancion y a ricibi 100% di tur royalties.

    E pikmento di guitara den e conocido cancion ‘Viva La Vida’ di ‘Coldplay’ tabata den man di Joe Satriani. Satriani a lanta un caso contra Chris Martin di ‘Coldplay’, pero a soluciona esaki pa medio di un acuerdo.

    Pa mas informacion tocante ‘plagiaat’, Oficina di Propiedad Intelectual ta extende un caluroso invitacion na publico en general pa pasa otro siman diabierna, 17 di november entre 9’or di mainta y 4’or di atardi na oficina situa na Adriaan Lacle Boulevard 3. Ricibi tur informacion y celebra hunto cu Oficina di Propiedad Intelectual su 30 aña di existencia, ‘Aniversario di Perla’.

    - Advertisement -

    DUNA COMENTARIO

    Please enter your comment!
    Please enter your name here