ORANJESTAD (AAN): Un biaha mas, DIARIO a haya sa cu e trahadornan di Parke Arikok ta disgusta con e directiva y specialmente e manager ta manehando e parke cu ta orguyo di Aruba.
Tur hende sa cu nan a presenta un plan di maneho pa trahadornan, pero ta parce cu tur enfoke y atencion di Parke awor ta dirigi pa area di Spaans Lagoen. Pues pa loke ta e Parke mes, nada di plan! Y esey ta e maneho di directiva y manager, y ningun trahador tin algo di bisa.
Trahadornan ta labora duro na e postnan, di p.e. cobra pa entrada di bishitantenan, y aki nan tin di soporta awacero, solo, biento, stof, y hasta insulto di bishitantenan. Tur esey, pa e 7 managernan sinta den airco, y nan mes no sa nada di e parke. Tur e placa cu ta wordo genera, ta bay na ‘overhead’ y pago di riba 50.000 Florin mensual na salario di nan. Nada di placa ta keda pa e futuro di Arikok.
Pa colmo, a ser splica cu Parke Arikok tin un supuesto “Research Manager”, pero awor ta sali na cla cu ta cu “Spaans Lagoen” so e ta preocupa su mes, y tambe cu asunto di Tribon den lama pa spanta turista. Pero Park Rangernan ta nada impresiona cu su trabao te cu awor. Nan ta opina cu directiva ta pagando e persona aki demasiado placa pornada.
Park Rangernan ta mustra cu nan tin persona di Personeelszaken cu no ta impresiona hendenan tampoco. Y e no ta buscando forma pa ni saluda hende mainta ni merdia.
Tambe tin e esposa di e manager hulandes, cu awor ta sinta traha den e Biblioteca na e Centro di Bishitante. Nan kier sa si e tin permiso di trabao pa Aruba, y si e ta wordo paga.
E trahadornan di Parke Arikok ta sinti cu nan input no ta worde scucha. Tambe nan a haya sa cu directiva kier cambia e logo di Parke, y atrobe e trahadornan no por bisa nada. Ta “Tribon” so tin riba dje y algun parha di ABC.
Pesey Park Rangernan ta solicita Ministro encarga cu Parke pa haci un investigacion den Financien, pasobra tin hopi cos cu no ta bay bon durante ultimo gobernacion. Si acaso nan detecta cu cosnan no a bay bon, e momento a yega pa pone e 7 Managernan aki responsable pa tur esey.
E speranza tey cu Ministro nobo lo tuma su tempo pa reuni den forma priva cu e trahadornan y Park Rangernan, pa asina haya sa nan banda di e medaya di tur e desaroyo tiki lamentable aki.
