Home General Poco poco hende muher a cuminza haya mas presencia den politica y...

Poco poco hende muher a cuminza haya mas presencia den politica y gobernacion

240
0
SHARE
- Advertisement -

Hende muher y politica na Aruba

ORANJESTAD   (AAN): Cu awe nos tin un Minister Presidente femenino, ta bin despues di un lucha largo pa igualdad di genero den politica na Aruba. A dura e hende muhenan no menos di 68 aña pa por a alcansa e puesto mas halto den politica riba nos isla.

E prome hende muhe pa subi un lista politico tabata Laura Wernet-Paskel, naci dia 18 di februari 1911, un maestra di scol, cu a subi lista di Partido Union Nacional Arubano (UNA II) encabesa pa Apolonio Werleman den eleccion na aña 1949 pa Gobierno Central. Tabatin dos partido UNA e tempo ey, pues UNA I encabesa pa Felipito Tromp y UNA II lidera pa Apolonio Werleman.

Pa loke ta funcionnan legislativo y ehecutivo den Gobiernonan, tanto Central di Antias como Insular di Aruba, tabata Maria Irausquin-Waitzberg (PPA) cu a bira e prome hende muhe pa bira miembro di Eilandsraad di Aruba na aña 1963.

Faustina Frank (PPA) a bira e prome hende muhe pa ocupa un puesto di Minister, e tempo ey Minister di Enseñansa, na aña 1976, tempo di Gobierno central di Antias. Grace Bareño (MEP) a bira e prome hende muhe pa asumi un rol como Diputado, esta Diputado di Enseñansa na aña 1979.

Despues di Status Aparte na 1986, Digna Lacle-Herrera (AVP) y Grace Bareño (MEP) a bira e prome hende muhenan pa drenta nos Parlamento. Alice van Romondt a bira e prome hende muhe pa asumi e posicion di Secretaria di Conseho di Minister na Aruba y den Reino Hulandes.

Ella Tromp-Yarzagaray (MEP) a bira e prome hende muhe pa asumi un puesto di Minister di Gobierno di Aruba, den e caso aki Minister di Finansa na aña 1993. Mervin Wyatt-Ras (MEP) a bira e prome hende muhe pa asumi e puesto di Presidente di Parlamento di Aruba na aña 2005. Particular ta cu el a ocupa dicho puesto dos biaha, un biaha pa MEP y otro pa AVP.

Monica Kock ta e prome hende muhe pa lanta su mesun partido politico y bira lider di Movimiento Patriotico Arubano (MPA) na aña 2005. Marisol Lopez a bira e prome hende muhe pa bira un Parlamentario independiente den Parlamento na aña 2012. Y awo, mr. Evelyn Wever-Croes (MEP) ta bira e prome hende muhe pa bira Minister Presidente di Gobierno di Aruba, desde November 2017.

Por menciona cu ainda tin un deficit grandi di genero den politica. Asina por corda cu na aña 2001 te 2009 bou Gobierno di asignatura di MEP tabatin un solo hende muhe, Marisol Lopez-Tromp den Conseho di Minister. Desde 2009 pa 2017, e Gobierno cu asignatura di AVP tabatin un solo hende muhe den Conseho di Minister, esta Michelle Hooyboer-Winklaar. Den e gabinete nobo, Wever-Croes di 2017, tin solamente 2 hende muhe den Conseho di Minister, esta Xiomara Ruiz y Evelyn Wever.

Den Parlamento e deficit a bira mas grandi den e constelacion nobo aki, pasobra den e constelacion 2013-2017 tabatin 9 hende muhe di e 21 miembronan, mientras cu awor tin solamente 7 hende muhe den e organo mas halto di nos pais. Solamente un tercera parti di Parlamento ta hende muhe.

 

- Advertisement -

DUNA COMENTARIO

Please enter your comment!
Please enter your name here