Home Suceso Polis ta suplica pueblo pa duna tip den caso di DeVuyst

Polis ta suplica pueblo pa duna tip den caso di DeVuyst

12924
0
SHARE
— Sarahi Sierra asesina na forma cruel.
- Advertisement -

ORANJESTAD (AAN): Famianan a keda den shock Diabierna merdia na compleho di casnan na DeVuyst, ora cu Diabierna nan a yega cas unda e deportista femenino hoben y semper alegre, Sarahi Sierra, ta biba.

Di trempan caba algun hende a haya hopi raro, cu nan ta yama Sarahi na telefon y e no ta contesta.

Ningun mensahe di Whatsapp e no tabata debolbe tampoco, y no ta ‘seen’ nan.

Te ora cu un famia a yega e cas, e ora a bin descubri un situacion hororoso den e cas.  E persona a core sali bay na hende eybanda, cu yen grito ta pidi yudanza.

Pa 1:40 pm, yamada a drenta na Central di Polis cu un dama hoben a ser haya sin bida.  Mesora Polis a move y aki a yega y nota cu no ta trata di un morto natural.  Tin indicacion cu a haya e dama aki mara, completamente sunu, y cu un saco di plastico mara rond di su cabez.  Riba su curpa tabatin varios marca di tortura.  Paramediconan tambe a yega, pero no por a haci nada mas.

Mas unidad di Polis, como tambe Recherche, Slachtofferhulp, y tambe Departamento Forensico di BFTO.  Na un forma cauteloso, autoridad a tuma tur clase di vingerprint, potret, midimento, y analisis di cualkier cabey of otro obheto cu por a haya den e cas.

E dama Sarahi a bay mainta hiba su yiu na creche, y despues e lo tabata na cas su so di mainta.

Ta inhusto cu el a perde su bida di e forma aki, via di posible un caso di violacion cu a caba na e forma extremo aki di tortura, y cu a kita bida di e deportista hoben.

Tabata 2:00 pm, cu Docter Giel a presenta pa constata morto di Sarahi Esther de los Angeles Sierra, naci na Aruba dia 10 September 1998 pues tin 19 aña di edad.  El a laga un yiu chikito atras.

Sarahi Sierra tabata bayendo scol pero a interumpi su estudio ora el a duna luz na un baby boy hopi spierto.  Pero e aña escolar aki, el a cuminza bek cu yen entusiasmo cu su lesnan, cu e meta solido pa logra su diploma.

E ta practica Volleyball activamente y ta hasta den e team “Venum”, unda e ta wordo mira semper como un di e mihor hungadornan, un deportista cu bo por depende riba dje.  Sarahi no ta un hende cu tin enemigo, como cu e ta hopi social cu tur hende.  Mundo di Volleyball na Aruba ta di luto tambe.

Riba Diasabra, Sarahi hunto cu su partner tabata planea pa debuta den e torneo di Beach Volleyball pa 1:00 pm den Joe Laveist Ball Park, un evento organiza pa federacion di Aruba Volleyball Association, AVA.

Pero debi na e noticia tristo aki, e competencianan di Beach Volleyball programa di Diabierna 3 November te cu Diadomingo 5 di November den Joe Laveist Ballpark a wordo cancela

E asesinato aki a pone tur bisiña den DeVuyst masha tristo mes riba Diabierna.

DIARIO a haya sa cu riba Diabierna, henter e atencion di Polisnan di San Nicolas tabata dirigi riba e caso di DeVuyst.

Conocirnan di e hoben, tambe ta mustra cu Sarahi ta un persona calmo, trankilo, nunca tin problema o envolvi den cualke problema, ta practica deporte pues ta un hoben sano.

Autoridadnan halto a wordo yama pa bay eynan, incluyendo Halto Comisario y tambe Ministerio Publico.  Fiscal mr. Erades tambe a presenta, y a duna ordo pa confisca e curpa.

Te atardi ainda Oficialnan Forensico tabata haci investigacion, y e.o. ta bay check si acaso ta un violacion aki a finaliza den asesinato.  Y esaki ta encera cu lo bay check tur email, yamada, y tambe messages cu e lo por a ricibi riba Diabierna.

Alrededor di 7:00 pm, diripiente un Pickup Double-Cabin a yega na e caya net banda di e cas na DeVuyst, y inmediatamente un grupo di hende a aglomera rond di e vehiculo, y nan tur tabata furioso contra e chauffeur.  Polisnan a core bay yuda tene e situacion bao di control, y nan a aleha e grupo tiki leu.  Pero e Pickup Double-Cabin a wordo confisca, y e chauffeur a bira un ‘persona di interes’ pa Polis den e caso aki.

Te banda di 7:20 pm, e restonan mortal di Sarahi a wordo hiba cu Auto di Funeraria di e cas.

Cuerpo Policial ta haci suplica na cualkier persona cu sa detaye, cu por a mira cualkier auto na e cas, of hende, of cu kizas nan tin security videocamera na nan cas, pa yama Tipline di Polis na 111-41.

Na famia, amigonan, y coleganan di e fayecida, DIARIO ta manda palabranan di condolencia.

 

- Advertisement -

DUNA COMENTARIO

Please enter your comment!
Please enter your name here