Home Parlamento Politiconan mester cumpli cu e aspectonan di liderazgo, respet y bon gobernacion

Politiconan mester cumpli cu e aspectonan di liderazgo, respet y bon gobernacion

52
0
SHARE
- Advertisement -

Parlamentario Rocco Tjon di MEP:

ORANJESTAD (AAN) – Den conferencia di prensa di Partido Movimiento Electoral di Pueblo (MEP), parlamentario  Rocco Tjon g a elabora tocante e temanan di bon gobernacion, integridad y transparencia, den cual liderazgo y respet ta esencial.

Parlamentario Tjon a cuminza cu ilustra e tema cu e discusion cu tin tocante e decisionnan cu gobierno demisionario a tuma, y cu segun MEP ta ilegal.

Tjon a indica cu ora di papia di bon gobernacion no solamente mester wak e aspectonan legal, kiermen si por tuma e decisionnan asina legalmente; pero tin algo tambe cu yama liderazgo y respet.

“Mi ta kere cu si respeta decision y resultado di eleccion, como gobierno demisionario mester por compronde cu e no por tuma cierto decisionnan cu ta bay mara e gobierno cu ta bay asumi responsabilidad den corto tempo.

E esencia di un mocion cu a wordo pasa ultimamente, cu ta trata e proyecto di hospital, ta netamente pa duna parlamento su autoridad bek pa por controla gobierno manera mester ta”, Parlamentario Rocco Tjon a subraya.

Liderazgo y transparencia kiermen respeta decisionnan y no sin mas bay mara e gobierno cu ta bay asumi responsabilidad y tambe no crea ilusion cerca personanan cu kizas ta kere cu decisionnan cu ta wordo tuma lo bay wordo honra, y cu ta bay wordo tuma a base di principionan di bon gobernacion y integridad.

Esaki ta un punto hopi importante y pesey Parlamentario Tjon ta kere cu Parlamento tambe sigur, lo mester asumi su responsabilidad manera mester ta y si wak e esencia di mocion cu a wordo pasa no ta solamente hospital, pero den e linea ey gobierno nobo lo sigui tambe.

“Si nos wak e programa di gobernacion e temanan cu ta hayando su atencion debidamente, ta integridad, bon gobernacion y transparencia y cu e mocion aki, nos como gobierno lo fiha, en todo caso, e rumbo cu nos ta bay encamina pa proyectonan den futuro tambe”, Parlamentario Rocco Tjon a subraya.

El a agrega cu, por ehemplo, den area di husticia tin hopi proyecto cu mester ehecuta, y e ta kere cu Parlamento lo tin un rol hopi importante akinan como Parlamento, como fraccion pero tambe como Comision.

Un di e proyectonan cu e parlamentario a menciona ta Scol di Polis, cu mester wordo transforma den un Academia di Husticia, unda ta bay wordo ekipa cu tecnologia nobo, expande, etc. Den e proyectonan aki den futuro, tambe mester tene cuenta cu e aspectonan di transparencia, bon gobernacion y integridad.

El a agrega cu tambe ta bay tin tecnologia cu mester bay wordo busca pa asina den e areanan di husticia por cana parallel na reglanan internacional.

Tjon a agrega cu den e programa di gobernacion ta wordo papia tambe di un Centro pa Hubentud cu tambe mester wordo estableci.

Tjon ta kere cu a base di e mocion cu nos a pasa ultimo den Parlamento, ta delinea e manera con Parlamento ta bay funciona den futuro, ora cu por ehemplo tipo di proyectonan manera el a menciona lo wordo ehecuta.

Finalmente, el a subraya cu politico y lidernan no solamente mester wak e aspectonan legal pa asina nan cubri nan mes, pero mester wak e principionan en general di loke ta respet, liderazgo y bon gobernacion.

 

 

- Advertisement -

DUNA COMENTARIO

Please enter your comment!
Please enter your name here