Home Beyeza Regina Janga lo representa Aruba den show di modelonan special na Denver

Regina Janga lo representa Aruba den show di modelonan special na Denver

33
0
SHARE
- Advertisement -

Fundacion “Sea bunita sea bo mes” ta anuncia calender 2018:

ORANJESTAD (AAN) – Fundacion “Sea bunita, sea Bo mes” a tene un conferencia di prensa, recientemente, conduci pa su presidente sra. Marianela Geerman.

E dama a splica cu e fundacion aki a wordo lanta pa traha cu muchanan cu Syndrome di Down, pero ora cu nan a cuminza cu nan presentacion artistico pa demostra cu nan tambe tin talento, e fundacion a wordo acerca pa muchanan autista, y tambe cu otro inhabilidad fisico.

E esencia di e fundacion ta keda pa traha cu muchanan cu Syndrome di Down, pero su shownan ta pa muchanan special, unda tur ta bon bini, pa participa.

Sra. Geerman a duna di conoce cu nan a traha un Calender 2018, dedica na nos muchanan special. E dama a expresa cu lamentablemente ta 12 luna so un aña tin, kiermen nan no por pone tur e muchanan special. No obstante, nan lo busca manera pa cada aña por agrega mas mucha special na e calender.

Tambe ta bay tin e modelo internacional 2917 cu a wordo scogi door di e organizacion mundial na Denver, Colorado cu ta esun cu ta scoge nan via skype.

Regina Janga ta bay representa Aruba, dia 11 di November, durante e show grandi “Be beautiful, be yourself” sra. Geerman a menciona. Aruba a scoge e nomber “Sea bunita, sea bo mes” cu ta cuadra cu esun di Merca.

Fundacion “Bira bunita, bira bo mes” a bira miembro di e organizacion mundial ariba menciona.

Sra. Geerman a duna di conoce cu na Merca tin hopi actividad pa e muchanan special locual na Aruba no ta e caso, y ora cu nan ta papia riba e tema aki cu e organizacion internacional, nan ta keda asombra cu na Aruba nan no ta wordo e muchanan aki no ta wordo inclui den eventonan, y nan ta puntra di con na Aruba no tin un ley di inclusion.

E fundacion “Sea bunita, sea bo mes” ta hiba un lucha pa e ley di inclusion wordo pasa door di e gobierno cu ta bay sinta, pasobra nan a purba cu esun anterior, pero no a logra.

Un di e trabaonan grandi cu e fundacion aki tin e meta pa realiza pa 2018, ta pa haya un scol di ofishi pa nan muchanan pasobra tin un scol so cu ta Scol Duna un Man, pero nan ta tuma nan te cu nan 16 aña. Despues di esaki nan no tin ningun lugar pa bay, nan tin cu keda sinta na cas cobra bijstand.

Den un scol unda nan por bay despues di nan 16 aña nan por siña hopi habilidad, entre otro informatica, pasobra nan ta muchanan hopi inteligente cu por haci tur cos, si nan wordo yuda y nan kier pa wordo duna e mesun oportunidad cu e otro muchanan.

Dia 11 di November e nomber di Aruba lo resona na Denver, masha grandi mes, cu participacion di e candidata di Aruba Regina Janga. Asina sra. Geerman a subraya. Esaki ta e di tres aña consecutivo cu Aruba ta wordo representa den e show grandi aki.

Esaki lo ta un evento unda celebridadnan grandi y hende multi- miyonario ta bay yena e sala, pasobra e evento ta un forma di fundraising pa recauda fondo pa nan organizacion mundial.

Sra. Geerman a duna di conoce cu e fundacion tin hopi plan pa 2018, entre nan un presentacion cultural pa asina fomenta e cultura di Aruba cerca e muchanan special, y lo scoge un “reina special y un rey special”, cu ta pa prome biaha lo sosode riba nos pais.

E organizacion aki tin un hospital cu ta brinda tur servicio gratuito pa e muchanan special, esta control medico, test, operacion, etc.

- Advertisement -

DUNA COMENTARIO

Please enter your comment!
Please enter your name here