Home Cultura Rivelino Rigters ta bon ehempel con bo por cambia bo bida den...

Rivelino Rigters ta bon ehempel con bo por cambia bo bida den un direccion hopi positivo

25
0
SHARE
- Advertisement -

El a inspira e muchanan na Scol di Arte

ORANJESTAD (AAN): Recientemente a tuma lugar un workshop di arte na Scol di Arte na San Nicolas, duna pa Xaviera Rigters Aubri.

Señora Aubri su mama a nace na Savaneta y semper como mucha e tabata bishita su welo cu wela y asina el a haya un stimacion pa e muchanan di San Nicolas.

Xaviera ta un estilista bastante conoci na Hulanda cu ta duna les na Academia di Arte na Hulanda y el a dicidi di duna un workshop gratis pa muchanan aki na Aruba.

E meta tabata pa yuda e muchanan descubri nan talentonan y stimula nan pa nan sigui desaroya nan mes.

No necesariamente den arte, pero tur hende por tin talento riba cierto tereno.

Durante e workshop DIARIO a papia tambe cu casa di Xaviera, esta Rivelino Rigters, kende ta un bon ehempel cu un hende cu tabata riba mal caminda, por Sali for di esaki, desaroya su mes y ta un bon ehempel pa hobennan.

Rigters te hasta a skirbi 2 buki.

El a splica cu e ta un coach di talento, mientras cu e ta un rapero y escritor di cancion.

Segun Rigters, e ta traha den prisonnan hubenil y tambe prisonnan normal na Hulanda y otro paisnan, unda cu e ta conta su storia, entre otro con el a perde su tata na edad hoben.

Na dado momento el a cay den gangnan di caya y a haya su mes den problema cu husticia, unda cu el a cay cera basta biaha.

El a logra sali for di e mundo ey atravez di musica y fe den Dios.

Su cancionnan di rap y rock den estilo gospel ta cu mensahenan positivo.

Asina el a bay Merca y Africa entre otro, unda cu el a comparti su mensahenan positivo.

El a splica cu door cu el a haya e gana di yuda mucha, el a cuminza su propio fundacion LOUD (Living Out Unlimited Dreams) na 2006.

Atravez di e fundacion el a logra drenta e sistema di prison, unda cu e ta purba inspira e criminalnan hoben pa nan coi e caminda positivo y pa nan descubri nan talentonan.

Como parti di e workshop aki na Aruba, el a papia cu e muchanan pa inspira nan tambe.

 

 

 

- Advertisement -

DUNA COMENTARIO

Please enter your comment!
Please enter your name here