Home Evenemento Sociedad di Ingenieronan cu reunion riba riesgonan relaciona cu exploracion y produccion...

Sociedad di Ingenieronan cu reunion riba riesgonan relaciona cu exploracion y produccion di petroleo y gas rond di Aruba

171
0
SHARE
- Advertisement -

ORANJESTAD (AAN): Diaranzon dia 22 di November 2017 Sociedad di Ingenieronan di Aruba (SIA) ta organiza un evenemento tocante exploracion y produccion di petroleo y gas rond di Aruba y su riesgonan.

Sr. Theo Bergers, awor consehero di Oranje Nassau Energie y cu tabata Managing Director di Cirrus Energy, operadornan di gas na Hulanda lo presenta con pa explora y produci petroleo y gas (E&P) en general y e riesgonan confronta.

Mientras Sr. Leopoldo Henriquez lo splica e principionan cu ta mara den e ley di Comunidad Europeo 2013/30EU (publica despues di Macondo) pa preveni desasternan grandi cu por pasa durante e actividadnan di E&P. Sr, Henriquez tabata un Hoofdinspecteur trahando na e servicio “Staatstoezicht op de Mijnen” cu ta encarga cu supervision di complimento di ley di minas Hulandes door di e operadornan cu E&P actividadnan na Hulanda y ariba lama cu ta pertenece na Hulanda (den Noord Zee).

E evenemento aki ta tuma luga na Universidad di Aruba di 7 pa 9 di anochi. Profesionalnan cu un grado di Bachelor of Science of mas ta cordialmente invita pa ta presente.

Tambe lo trata e siguiente preguntanan, manera: (*) REPSOL a haya petroleo of gas caba?  (*) Kende ta doño di e petroleo of gas rond di Aruba? Hulanda of Aruba?  (*) Kico e instalacionnan cu facilidad pa bora ancra pa suid di Aruba ta haci?

Historia:

Na augustus 2017 e Ministro di Energia ta anuncia cu REPSOL y su partner TOTAL lo bay bora pa petroleo y gas den cuatro area 15 kilometer den lama panortd di Aruba.

Segun e Ministro gobierno di Aruba a scohe REPSOL pa motibo di nan porcentaha di succes y pa motibo cu nan ta uza tecnologia superior.

Actividadnan di E&P semper ta contene peligronan grandi manera a experiencia na april 2010 cu e desaster di e platforma “Deep Horizon” cu tabata borando e pos Macondo den Golfo di Mexico pa British Petroleum (BP). A consecuencia cu 11 hende a muri, miyones di bari di zeta drama den lama y tambe e perdida di e plataforma “Deep Horizon”.

Mundialmente esaki a causa atrobe un shock den e industria di E&P y entre e gobiernonan encarga cu e supervision di complimento di ley. Atrobe pasobra esaki tambe a pasa na 1988 ora cu e plataforma di produccion “Piper Alpha” a explota causando 167 morto y e plataforma destrui. Entre tanto diferente otro desasternan a pasa mundialmente, manera esun di Texas Refinery tambe di BP na 2005.

Ni maske cuanto superioridad un compania por tin semper tin e probabilidad cu un accidente grandi por pasa. Y esaki no ta un excepcion pa cu e actividadnan rond di Aruba. Ningun compania por duna un garantia di 100% cu nada no por pasa. Pero mester siña si for di e desasternan pa haya sa kico a causanan pa asina por tuma e medidanan necesario pa preveni esakinan of minimalisa nan. Implementacion di sistemanan pa manehanan adecuadamente por yuda preveni e desasternan aki.

Reserva un luga di antemano ta necesario.  Como cu luga ta limita por fabor haci un reserva pa medio di un email pa e secretario di SIA y su adres ta leohenriquez@ecoprofile.eu pero no mas tarda cu dialuna 20 di november 2017 12or di merdia.

 

- Advertisement -

DUNA COMENTARIO

Please enter your comment!
Please enter your name here