Home Parlamento Ta cuestion di oranan pa huramentacion tuma lugar y Aruba conoce su...

Ta cuestion di oranan pa huramentacion tuma lugar y Aruba conoce su gobierno nobo

174
0
SHARE
- Advertisement -

Segun Dangui Oduber:

ORANJESTAD (AAN) — Parlamentario Dangui Oduber a menciona den conferencia di prensa, cu e proceso di formacion di gobierno a yega su etapa final, y ta cuestion di oranan pa e huramentacion tuma lugar, pues dentro di poco dia Aruba lo conoce su gobierno nobo, esta e Gabinete Wever-Croes.

El a bisa asina como contesta na un pregunta di prensa, mirando cu MEP tin critica riba gobierno saliente, pero nan mes ta tardando mas cu seis siman pa forma gobierno, y for di e punto di bista aki gobernacion tog, mester continua.

Oduber a bisa cu Diabierna ultimo a wordo anuncia caba pa Formador cu a yega na un acuerdo entre e Partidonan MEP, POR y RED.

Tambe ta asina cu Formador a expresa den diferente ocasion cu forma un gobierno no ta un proceso facil, ta hopi negociacion a tuma lugar durante seis siman cu e preparacion.

E Parlamentario a pone Hulanda como ehemplo, unda a tuma seis luna pa yega na un gobierno di coalicion, mientras cu na Aruba solamente seis siman. Logicamente, tur hende ta desea pa e proceso aki lo a bay mas lihe pa nos tin un gobierno for di dia 30 di October caba, pero lamentablemente esey no tabata e caso, segun e Parlamentario.

En todo caso, e parlamentario a señala, tin un acuerdo di gobernacion firma caba y ya pronto e huramentacion lo tuma lugar, pa evita cu e fiesta di e gobierno demisionario sigui, tumando decisionnan cu ta en pugna cu reglanan di bon gobernacion, y en pugna di e vision di un gobierno nobo.

Riba otro pregunta tocante ki dia gobierno ta huramenta, e por a compronde for di Formador ta cu e proceso pa cede asiento di e candidatonan cu ta bay bira minister na esnan cu lo reemplaza nan den Parlamento mester tuma lugar.

Manera ta conoci MEP lo bay tin cinco minister cu mester entrega nan asiento y pone esaki disponible y e ora ey e proceso di huramentacion nobo lo cuminza. Tur esaki en concordancia cu Gobernador.

Prome cu e proceso aki cuminza, Gobernador lo mester duna un green line. Un bez cu e credencialnan di esnan nobo cu lo drenta Parlamento keda cla y wordo aproba pa Staten, nan lo pasa pa huramentacion como miembronan nobo di Staten y di eynan ta sigui pa formacion di e Gabinete nobo Wever-Croes.

Encuando e rumornan cu ta core cu tin miembronan no ministeriable pa forma gobierno, y hasta tin nomber ta wordo menciona, Oduber a bisa cu tur esaki ta “fake news”.

Ningun di e noticianan cu ta coriendo rond ta cuadra cu realidad, pasobra e proceso d screening a termina for di siman pasa y tur miembro cu a wordo presenta como posible candidato pa bira minister ta ministeriable.

El a enfatiza cu tur noticia den e rednan social pa trece sensacionalismo ta noticia falso pa crea confusion. Realidad ta cu ta cuestion di oranan pa e huramentacion tuma lugar y pa Aruba  conoce su gobierno nobo, Dangui Oduber a remarca.

 

 

- Advertisement -

DUNA COMENTARIO

Please enter your comment!
Please enter your name here