Home Parlamento Tur ultimo decision tuma pa gobierno demisionario lo wordo hala atras

Tur ultimo decision tuma pa gobierno demisionario lo wordo hala atras

152
0
SHARE
- Advertisement -

Parlamentario Dangui Oduber a confirma:

ORANJESTAD (AAN) – Diaranzon mainta a tuma lugar e conferencia di prensa di Partido Movimiento Electoral di Pueblo (MEP) cu participacion di e Parlamentarionan sres. Dangui Oduber, Rocco Tjon y sra. Xiomara Maduro.

Oduber a trece dilanti cu e fiesta di gobierno demisionario ta continua y nan ta sigui compromete e proximo gobierno cu decisionnan cu MEP no ta di acuerdo cu nan, entre otro, e vergunningnan ofreci pa opera taxi y autobus, despues di e eleccion.

Dangui Oduber a expresa cu diferente toezegging cu minister Sevinger a duna encuanto e desaroyo di nos industria turistico, unda MEP a bin compronde cu e mandatario (demisionario) a bay di acuerdo pa Hotel Holiday Inn bira “all inclusive”.

E ta corda cu den pasado tabata tin un discusion fuerte al respecto y fraccion di MEP a bin cu un amienda, cu nan no kier mira mas ampliacion di camber “tur cos inclui”.

Oduber a acentua cu MEP ta lamenta esaki hopi pasobra gobierno demisionario solamente por atende “lopende zaak” (asunto coriente cu ta sigui su curso); pero aparentemente tur decision cu nan a tuma a bira “lopende zaak”.

“Esaki ta muestra cu nan no ta tene cuenta cu pueblo, pasobra pueblo a bisa caba cu nan no ta di acuerdo cu desaroyonan grandi, cu nan no ta di acuerdo cu mas all inclusive. Apesar di esaki minister Sevinger ta bay di acuerdo cu esey”, Parlamentario Dangui Oduber a subraya.

E parlamentario a agrega cu no ta solamente esaki. Aparentemente, e minister a bay di acuerdo cu un proyecto hotelero na Bubali di cual tambe tabata tin hopi discusion riba dje. Dangui Oduber ta corda cu e ex-minister di turismo Otmar Oduber no tabata di acuerdo cu e desaroyo aki, y a surgi un discusion, pero awor como minister demisionario sr. Sevinger a aproba esaki. “Kiermen mas camber di hotel atrobe” Oduber a expresa.

Banda di esaki MEP tin entendi cu na Ritz Carlton tambe e mandatario demisionario a duna toezegging pa 30 camber cual destinacion a wordo bendi estilo condominium.

“Na lugar cu nos ta bezig pa eleva nos producto turistico y upgrade esey, minister Sevinger hunto cu e gobierno demisionario di AVP ta bezig ta degrada nos producto turistico. Tur e decisionnan aki, e proximo gobierno cu, dentro di e proximo dianan aki lo huramenta, no ta di acuerdo cu nan.

Mi no ta kere cu un gobierno demisionario por keda tuma decisionnan asina, cu ta contra tur regla di bon gobernacion, pasobra nos a bisa den pasado cu na e momentonan aki, Aruba no mester di mas camber all inclusive”, Oduber a reitera.

El a señala cu e proximo gobierno kier mira desaroyonan den e sector turistico pero cu ta eleva y mehora nos producto Aruba. Tur e decisionnan y permisonan cu a wordo duna, ya cu nan tin entendi cu tin hopi mas vergunning cu a wordo duna e ultimo dianan aki, no lo wordo honra.

Oduber a subraya cu, aparentemente, minister Sevinger ta dura mas ora formando permiso di tereno cu oranan den Parlamento. Kiermen, keto bay e ta keda duna tereno tur caminda, duna permiso y compromete gobierno cu decisionnan cu no ta cuadra cu e vision di e proximo gobernacion.

“Pesey ta importante cu ora e proximo gobierno asumi su responsabilidad, nos haci un inventarizacion di tur e compromisonan cu a wordo haci sin autorizacion pa e ora ey nos wak den ki direccion no ta bay; pasobra nos a bisa caba cu nos tin un vision unda nos kier bay cu e producto Aruba y tin decisionnan cu nos kier tuma, pero en todo caso loke minister Sevinger ta haciendo e ultimo dianan aki, ta hopi iresponsable y cu mester wordo revisa di nobo”.

E parlamentario a reitera cu enfasis cu tur decision cu e gobierno demisionario a tuma y cu ta contra e leynan di bon gobernacion, lo wordo hala atras y tur e decisionnan cu nan a tuma ta contra regla di bon gobernacion.

 

- Advertisement -

DUNA COMENTARIO

Please enter your comment!
Please enter your name here