Varios medida di urgencia a tuma na Hospital pa evita un eventual explosion

    103
    0
    SHARE
    - Advertisement -

    Director Ezzard Cilie:

    ORANJESTAD (AAN) – Den conferencia di prensa, director di Hospital dr. Horacio Oduber, sr. Ezzard Cilie a amplia tocante e situacion cu a surgi na Hospital ayera mainta, debi na un derame di diesel cu a afecta henter hospital.

    MEDIDA DI URGENCIA:

    Director di Hospital a splica cu nan mester a tuma un medida di urgencia, cual ta kita e coriente na hospital.

    Esaki ta necesario pasobra e caminda e humedad y e caminda unda e fuel a plama ta crea un peligro grandi pa un explosion.

    Cilie a papia di un explosion di un dimension cu solamente comparable na cualkier eventualidad den un instancia manera WEB of Valero. Kiermen, asina grandi e impacto di algo asina lo por ta.

    E motibo di locual a sosode nan no sa ainda. Esaki ta bay wordo investiga. Sr. Cilie a indica cu nan ta buscando tur e stakeholders pa nan tuma nan responsabilidad den e situacion aki, y hunto wak kico mester haci.

    E director a duna di conoce cu mester a cera tur camber di operacion y tin dos di urgencia pafo di hospital por si acaso mester opera un pacient di urgencia.

    E pacientnan cu ta depende di cuido intensivo a wordo poni na otro lugar, pero na un manera profesional pa esaki no bay costa bida di ningun hende.

    Ademas di tur medida prudente cu a wordo tuma IMSAN tambe tey pa brinda ayudo. E departamento di radiologia no por funciona e holo cu ta sali eynan no ta bon pa pacient ni pa trahador, y den esaki IMSAN ta yudando HOH pa carga e peso aki. Mariniers Kazerne tambe ta dunando un man si e medidanan mester bira mas drastico.

    Cilie a reitera cu Hospital a tuma tur precaucion pa e pacientnan ta safe y a menciona cu segun a calcula lo a tuma di dos pa tres ora (na momento cu e rueda di prensa tabata tumando lugar) e situacion lo a keda soluciona pa bolbe na normalidad.

    Pero asina mes, ainda lo mester a investiga kico précis a pasa, kico a causa e dilema aki. El a señala cu mirando cu hospital ta bao di construccion, e tipo di cosnan aki por sosode, y e situacion a surgi den e edificio nobo.

    Ningun pacient a bay cas, no obstante si mester a cancela e horario di bishita di merdia na pacient pa asina tin menos hende y menos fluho si persona por si acaso mester bay na medida mas drastico.

     

    - Advertisement -

    DUNA COMENTARIO

    Please enter your comment!
    Please enter your name here