Home Parlamento 80% di abuso sexual di mucha na Aruba ta trans-generacional

80% di abuso sexual di mucha na Aruba ta trans-generacional

246
0
SHARE
- Advertisement -

Parlamentario Sue-Ann Ras:

ORANJESTAD (AAN) – Diaranzon mainta a tuma lugar den Sala di Comision di Staten, e conferencia di prensa di fraccion di MEP, den cual a hiba palabra sra. Sue- Ann Ras, sra. Daphne Lejuez y sr. Edgar Vrolijk.

Parlamentario sra. Ras a inicia e conferencia di prensa, y a referi na e Dia Nacional cu ser observa ayera, dia cu a dera e dos rumannan victima den e suceso cu a conmove nos comunidad y no gobierno.

E dama a señala cu e dia aki tabata pa nos tur para keto y reflexiona riba kico ta pasando riba nos Isla. E parlamentario a recorda e asesinato cruel di un damita, loke a sosode na su cas, na De Vuys, un luna pasa, y cu ainda no a haya luz riba e caso pa haya sa kico a sosode.

Y dos siman pasa e dos criaturanan aki cu tambe ta parti di e cantidad barbaro y drastico di abuso di mucha (incluyendo abuso sexual) aki na Aruba.

E parlamentario a subraya cu nos mester puntra nos mes como ser humano, como mayor y como adulto, kico nos ta haciendo pa loke ta trata e forma di anda cu nos muchanan.

E dama a expresa cu na Aruba tur ora nos ta grita cu nos muchanan ta nos futuro, cu nan ta e generacion cu nos tin cu laga prepara pa despues sigui cu nos pais, pero den e direccion cu nos ta bayendo actualmente, sigur nos no ta preparando un generacion cu por fungi optimalmente como ciudadano pa e pais aki.

Esey ta un pregunta, e Parlamentario a reitera, cu nos tin cu haci nos mes pasobra cada ken mester reflexiona pa su mes unda algo ta bayendo robes y unda por mehora e forma con ta anda cu muchanan. No solamente nos yiunan pero tambe muchanan di scol, di bario, etc.

KICO CIFRANAN TA MUSTRA:

Parlamentario sra. Ras a indica cu den un entrevista cu un instancia a sali na cla cu 80 porciento di e casonan di abuso sexual di mucha, ta trans-generacional locual ta un nivel hopi halto.

“Esaki ta un tema tabu na Aruba ainda, pero si cu nos ta conociendo generacion tras generacion. Antes nan no tabata papia hopi di esaki den famia, mucho menos den comunidad, pero actualmente nos ta scuchando cu mucho mas ta bin dilanti, unda cu tata, omo, welo ta cuminza haci actonan sexual cu mucha chikito. Esaki ta un hecho condenable y castigable sigur, mirando cu como adulto nos tin cu proteha nos muchanan. Nos ta net esnan cu nan ta confia mas, y esnan cu ta probecha di e confianza aki di nos muchanan den nan inocencia, y comete actonan cu sigur ta condenable”, Parlamentario sra. Sue-Ann Ras a subraya.

- Advertisement -

DUNA COMENTARIO

Please enter your comment!
Please enter your name here