Home Hudicial Abogado David Kock mustrando cu Ady Thijsen ta “wrong and strong”

Abogado David Kock mustrando cu Ady Thijsen ta “wrong and strong”

47
0
SHARE
- Advertisement -

ORANJESTAD (AAN): Diamars a tuma lugar den Corte, e caso sumario entabla contra Presidente di Parlamento.

Defensa di Headlines Group y di Nelson Andrade, contra Parlamento di Aruba e biaha aki tabata den mannan di abogado mr. David Kock. El a cuminsa na splica Hues cu ta sinti cu aki ta un caso di discriminacion y un atentado serio contra nos democracia y libertad di prensa. El a pidi Corte pa obliga e Presidente di Parlamento pa e destrui e dos cartanan cu medidanan disciplinario tuma contra e miembro di prensa.

Abogado mr. David Kock a enfatisa cu libertad di expresion ta un asunto sagrado y mara den tratadonan internacional, entre otro di Corte Europeo bou cual nos ta resorta. El a splica cu ta na paisnan Africano y Asiatico nos conoce e forma di traha asina, den cual Gobierno ta limita e libertad di expresion entre otro di Prensa.

Tur cos a cuminsa dia 1 di december ora Nelson Andrade e traha un reportahe den sala di Parlamento sinta na stoel di e Presidente, relaciona cu e logo di Parlamento. A sinta na e stoel pasobra net su tras e logo ta colga, pues asina riba video por mire den fondo. E reportahe aki, obviamente, no a cay den bon tera cerca e Parlamentarionan cu riba red social a worde critica masha pa tin prioridadnan robes.

Dia 5 di december e Presidente di Parlamento, mr. Juan “Ady” Thijsen a manda un carta pa 24Ora y a keha riba comportacion di Nelson Andrade y a anuncia cu tin regla, etc.

Ironia di bida ta cu e bode di Parlamento a entrega Nelson Andrade mes e carta, pasobra ni sikiera tabatin un nomber riba dje.

E mesun dia, Nelson Andrade, durante su noticia na Canal 90, esta Enfoke 90, a critica Parlamento pa e hecho aki cu a mande un carta y a bisa e ta sinti cu ta persiguie y strobe di haci su trabao. El a indica cu e tin mas di 20 aña ta haciendo e trabao aki y semper tabatin aceso liber na Parlamento. Claro, semper y cuando cu cooperacion di e miembronan di siguridad y e mesun Parlamentarionan cu ta yame pa entrevista. el a bisa di lo sigui bay Parlamento cuando biaha cu e kier.

Atrobe e declaracion ey na radio no a conta cu aprobacion di e Presidente nobo di Parlamento cu e ora a mande un otro carta dia 8 di december indicando cu awor e ta haya 3 luna di prohibicion pa drenta e edificio. Tras di e carta ey a sali un carta di abogado Kock na Thijsen, urgiendo e pa e reconsidera su decision y pa e hala su carta aden. E no a haci esey y consecuentemente a inicia e caso sumario.

E abogado a splica Hues Sap den Corte cu e pret ta cu e fecha di e carta di di prohibicion di entrada a bin prome cu e carta cu a sali pa prensa pa anuncia maneho nobo. E ta sinti cu a sanciona Speed Andrade prome y despues impone regla. E storia cu ta reglanan existente no ta valido, sino no tabata necesario manda un carta pa prensa. Ta mas cu obvio cu ta regla nobo e Presidente nobo a caba di introduci, cu ta su bon derecho.

Pero, mirando e actitud di Ady Thijsen di no kier recapacita, abogado Kock a considera den Corte cu e ta actuando estilo “Wrong and Strong”, locual ta inaceptabel. E Presidente di Parlamento mester compronde cu leynan ta traha pe tambe y cu e no tin e autoridad cu e ta kere pa impone un sancion contra un miembro di prensa cu a critike na radio. Su autoridad ta cuminsa y caba den sala di Parlamento. A duna ehempel di por pone regla pa vestuario, pa comportacion den tribuna, etc. Pero no por ta asina cu si bo critike den bo radio, cu mesora ta sali un carta pa prohibibo drenta e edificio.

Abogado Kock a bira wak e periodistanan den sala y a corda nan pa wak bon con nan ta relata e caso pasobra si e no cay na agrado di Ady Thijsen, cu e chens ta cu nan por haya un carta tambe mayan. Tur di nan hariendo a compronde mesora cu e Presidente hamas por basa un maneho riba e libertad di prensa cu cada un ta goza di dje den un pais di estado di derecho, manera Aruba.

Hues a scucha ambos partido y na final a bisa cu e tin e decision caba y e tin un bon sinti di kico ta tumando luga aki. El a bisa cu mayan mes, prome cu fin di dia, e lo manda su decision via fax.

 

- Advertisement -

DUNA COMENTARIO

Please enter your comment!
Please enter your name here