Home Social Aplicacion ta habri pa huurdo pa Smart Community Aruba

Aplicacion ta habri pa huurdo pa Smart Community Aruba

31
0
SHARE
- Advertisement -

ORANJESTAD(AAN): — FCCA ta participa na e comunidad Arubano cu e 15 casnan construi den e proyecto Smart Community Aruba na Kibaima a wordo finalisa y e traspaso di e esakinan for di e contratista a tuma lugar.

FCCA na su turno a prepara un procedura di registracion pa esnan cu tin interes pa huur un di casnan aki y tambe cu ta dispuesto pa participa na e experimento/estudio cu TNO lo haci conhuntamente cu e otro partnernan den e proyecto.

FCCA a desaroya y a construi e proyecto aki den colaboracion cu otro partnernan manera Utilities Aruba N.V., N.V. Elmar, WEB Aruba N.V., Pais Aruba y TNO Caribbean. Ta trata akiun proyecto planea cu 20 vivienda, for di cual den e prome fase a construi 15 vivienda energicamente eficiente.

E obhetivo di e proyecto ta pa conhuntamente cu e partnernan haci experimento y crea mas conocemento cu lo ta na beneficio di pais Aruba y henter e comunidad di Aruba. Smart Community Aruba lo bira un bario residencial cu lo fungi como un isla di energia sostenible dentro di Aruba.

Locual ta fundamental ta pa hasi investigacion y desaroya solucionnan tecnologico cu por wordo expande y crea modelonan cu ta hasi e transicion pa sistemanan di energia sostenibel un realidad. Pa FCCA ta importante pa por siña con pa construi casnan mas eficiente y tambe con pa hasi adaptacion nan na nos casnan existente.

Tur esnan cu tin interes y un enfoke pa biba den un bario manera di Smart Community Aruba, cu kier siña hunto cu e partnernan di Smart Community Aruba, sea bo ta un young professional, un famia cu yiu of un pareha 55+, pasa libremente na oficina principal di FCCA na Sabana Blanco pa busca informacion of bishita nos website www.fcca.com payena e formulario di aplicacion online. Por haya informacion di e proyecto aki tambe bishitando e website di Smart Community Aruba, www.smartcommunityaruba.aw

Ta importante pa remarca cu pa bin na remarca pa huur un di e casnan, e solicitante mester yena e formulario di aplicacion, cual lo encera tambe un descripcion di e motivacion y interes cu e aplicante tin pa kier biba den un bario manera esaki. E aplicante mester sa cu como huurdo e mester ta dispuesto pa duna cooperacion – na cualkier momento – encuanto e midimento y monitor di consumo di coriente y di awa y/of otro informacion etc. etc. etc. y laga comparti esaki cu FCCA y e partnernan di Smart Community Aruba.

Tur esnan interesa por scoge un di siguiente formanan pa aplica:

  • Yena e formulario special na un di e oficinanan di FCCA
  • Yena e formulario special digital online via website www.fcca.com, Smart community.

Aplicacion lo ta habri entre 18 di december te cu 31 Januari 2018.

 

- Advertisement -

DUNA COMENTARIO

Please enter your comment!
Please enter your name here